Олий Мажлис Қонунчилик палатасининг навбатдаги йиғилишида 2023 йилга мўлжалланган давлат дастурининг дастлабки ярим йил давомида қандай бажарилгани кўриб чиқилди. Мулоқотда сўз олган “Миллий тикланиш” партияси раиси, депутат Алишер Қодиров ижтимоий ҳимоя бўйича олиб борилаётган давлат сиёсати тўғрисида фикр билдирди.
Фото: “Дарё” / Мадина Нурман
Алишер Қодировнинг айтишича, ижтимоий ҳимоя тизимида тарғибот масаласи оқсамоқда.
“Мамлакатда ижтимоий кўмак бўйича катта давлат сиёсати олиб бориляпти. Бу биз учун устувор масала. Аҳолига ёрдам бериш жуда ҳам тўғри. Лекин жуда кўп депутатларнинг жойларда олиб бораётган таҳлиллари шуни кўрсатмоқдаки, одамларнинг шукроналик кайфиятида салбий ўзгаришлар бор. Одамлар бугун ижтимоий кўмакни бошқача қабул қиляпти. Кўмак бериш албатта, давлат сиёсати. Бироқ ҳар бир ижтимоий ёрдамнинг орқасидан тарғибот-ташвиқот масалаларига жиддийроқ эътибор бермасак, аҳолини боқиманда қилиб қўйиш хавфимиз бор деб ўйлайман”, — деди у.
Мажлисда Алишер Қодиров олий таълим муассасаларига кириш имтиҳонларида айрим абитуриентларга берилаётган имтиёзларни қайта кўриб чиқиш кераклигини айтди.
“Ўқув даргоҳларига имтиҳонлар бошланган. Жамоатчиликдаги бир масала бизнинг диққатимизни тортди. Имтиёзлар масаласини таҳлил қилиб чиқишимиз керак. Чунки бугун имтиҳонга яхши тайёргарлик кўрган талаба энг юқори — 189 баллни тўплай оляпти, лекин қўшимча имтиёз билан келган айрим таълим ташкилотларидаги йигитлар тўлалигича давлат грантларини қамраб олишга эришяпти. Бу 189 балл тўплай олган абитуриент учун адолатсизлик бўлиши мумкин. Бу ерда имтиёзлар тизимини адолатлироқ қилиб, балки қайтадан кўриб чиқилса, тўғри бўларди”, — деди депутат.
Аввалроқ жамоатчилик фаоллари “Темурбеклар мактаби” битирувчиларига ҳарбий таълим муассасаларидаги имтиҳонларда ўз тўплаган балларининг 30 фоизи, бошқа ОТМларда 15 фоизи миқдоридаги қўшимча баллар берилишини танқид қилганди. “Тизимдаги адолатсизлик сабаб оддий қишлоқ боласининг ўрнини замонавий шароитлардаги “Темурбеклар мактаби”да ўқиб, имтиёз олган болалар эгаллайди”, — дея фикр билдирганди фаоллардан бири.
Изоҳ (0)