Қашқадарёда икки нафар тожикистонликнинг ҳаёти сақлаб қолинди

Қашқадарё вилоятидаги Ғузор дарёсига тушиб кетган юк машинасидаги икки нафар Тожикистон Республикаси фуқароси пачоқланган темирлар орасида қисилиб қолиб, тан жароҳати олди. Туман Фавқулодда вазиятлар бўлими қутқарувчилари уларнинг ҳаётини сақлаб қолди. Бу ҳақда вилоят Фавқулодда вазиятлар бошқармаси ахборот хизмати хабар берди.

Таъкидланишича, кеча, 5 август куни соат17:40 ларда Ғузор туманининг “Оби-ҳаёт” маҳалласида жойлашган Пачкамар қишлоғи ҳудудидан ўтувчи Термиз—Тошкент М-39 автомобиль йўлининг 1249-километрида DAF русумли юк машинаси ҳайдовчиси эҳтиётсизлиги оқибатида бошқарувни йўқотиб, Ғузор дарёсига тушиб кетган. Натижада икки нафар Тожикистон Республикаси фуқароси пачоқланган темирга қисилиб қолиб, тан жароҳати олган.

Келиб тушган хабарга кўра, Ғузор туман ФВБдан қутқарув экипажи воқеа жойига соат 17:55 ларда етиб борган, ёнғин-қутқарувчиларининг саъй ҳаракатлари ва маҳаллий фуқароларнинг кўмагида икки нафар фуқаро қутқарилиб, туман тиббиёт бирлашмасига юборилди. Ҳозирда фуқаролар шифокорлар назоратида, — дейилади бошқарма ахборотида.

Қўшимча қилинишича, ҳолат бўйича суриштирув ишлари олиб борилмоқда.