Грузиянинг Рача минтақасида содир бўлган кўчки қурбонлари сони 11 кишига етди. Яна 25 кишининг тақдири ҳозирча номаълум. Қидирув-қутқарув ишлари давом этмоқда, деди соғлиқни сақлаш вазири Зура Азарашвили.
“Бедарак йўқолган 36 кишидан 11 нафарининг жасади топилиб, шахсини аниқлаш учун экспертизадан ўтказилди. Ҳозирда қидирув-қутқарув ишлари давом этмоқда”, — деди Азарашвили.
Қидирув-қутқарув ишлари бугун, 5 август куни эрталаб қайта тикланди. Соғлиқни сақлаш вазирлиги раҳбарининг сўзларига кўра, тунда эпитцентр зонасига махсус техника ва ишчи кучини етказишга ёрдам берадиган кўприклар ва қўшимча йўллар қуриш ишлари давом эттирилади.
“Эртага эрталаб кўприк тайёр бўлади ва биз у ерга махсус техникани олиб ўтамиз”, — дея қўшимча қилди у.
3 август куни Грузиянинг Шови қишлоғидаги Сунсет Шови меҳмонхонаси яқинида ер кўчиши содир бўлди. Натижада кўчки оқими кўприкларни ва йўлларни бузди, меҳмонхонага туташ коттежларни қоплади.
Табиий офат зонасидан 210 киши эвакуация қилинди. Қидирув-қутқарув ишларига 400 га яқин қутқарувчи жалб этилган. Бош вазир Ираклий Гарибошвили 7 августни мотам куни деб эълон қилди.
Изоҳ (0)