Алексей Навальнийга “сталинча” ҳукм ўқилди. Мухолифатчи 19 йилга қамалди

Москва шаҳар суди Владимирдаги қаттиқ тартибли колонияда ўтказилган йиғилишда сиёсатчи Алексей Навальнийни 19 йилга қамади. У жазони махсус режимли колонияда ўтайди. Бу ҳақда BBC хабар берди.

“Экстремизм” иши бўйича суд жараёни махфий тарзда ўтказилган. У 19 июнда бошланиб, бир ой давом этган, барча учрашувлар ёпиқ эшиклар ортида бўлган.

20 июль куни прокурор фирибгарлик иши бўйича тўққиз йиллик қамоқ жазосини ўтаётган Навальнийга яна 20 йиллик махсус режим сўради. Муддат аввалги жазога қисман қўшилган ҳолда сўралган.

Махсус режимли колониялар озодликдан маҳрум қилишнинг энг оғир шароитларига эга бўлган муассасалардир. У ерга, Россия Жиноят кодексига кўра, умрбод қамоқ жазосига ҳукм қилинган ёки “жиноятнинг ўта хавфли тури” билан жазоланган эркаклар юборилади. Навальний ишида айблов шу иккинчи пунктга қаратилган.

“Экстремизм” иши бўйича Навалнийга Россия Жиноят кодексининг етти моддаси бўйича айблов қўйилган бўлиб, улардан энг оғири экстремистик жамият яратиш бўлган. Россия ҳукумати Коррупцияга қарши кураш фондини “экстремистик ҳамжамият” деб ҳисоблайди.

Бундан ташқари, мухолифатчи экстремизмга чақириш, экстремистик ҳаракатларда иштирок этиш, фуқаролар ҳуқуқларини поймол қилувчи нодавлат ташкилот тузиш, экстремизмни молиялаштириш, ўсмирларни хавфли ҳаракатларга жалб этиш ва натсизмни оқлашда айбланган.

Бу иш бўйича яна бир айбланувчи, Navalniy LIVE YouTube каналининг собиқ техник директори Даниэль Холоднийга прокурор томонидан 10 йил давомида жазони колонияда ўташ сўралган. Охир-оқибат у қандай жазога ҳукм қилингани аниқ эмас.

Навальний унга “сталинча” ҳукм берилишини билганди

Аввалроқ мухолифатчи Алексей Навальний унга узоқ муддатли қамоқ жазоси тайинланиши, бу Кремль режимидан норозиларни қўрқитиш учун амалга оширилаётганини айтганди.

“Озодликдан маҳрум қилиш муддати узоқ — ‘сталинча’ бўлади. Уни ҳисоблаш формуласи оддий: прокурор сўраган нарса, минус 10-15 фоиз. Улар 20 йил сўрайди, бироқ 18 ёки шунга ўхшаш йил берилади. Бу унчалик муҳим эмас, бунинг кетидан терроризм иши турибди. Бу бўйича яна 10 йил берилиши мумкин”, — деган у.

Шунингдек, мухолифатчи унга қамоқ муддати берилгач, “Сталин давридаги каби” нола қилмасликни тавсия қилганди.

“Яхшиси, ўйлаб кўринг, нега бундай катта муддат бериляпти? Бунинг асосий мақсади — қўрқитиш. Мени эмас, сизларни”, — деган Навальний суд ҳукмидан олдин.