Украина Қуролли кучлари қарши ҳужумнинг учинчи босқичини бошлади. Украина Запорожье вилоятидаги Работино аҳоли пункти ҳудудида олдинга силжиш учун армия захирасидаги 10-корпусни жалб қилди. Бу ҳақда Тҳе Washington Post хабар берди.
Работино украиналик ҳарбийлар учун Россия мудофаа чизиғини ёриб ўтишда катта аҳамиятга эга. Шу тариқа Работинодан Россиянинг асосий мудофаа чизиғига тахминан 19 километр қолади. Нашр Украина Қуролли кучлари қарши ҳужумининг учинчи босқичи бошланганини таъкидламоқда.
“Ҳужумнинг биринчи босқичи июнь ойида, Украина Қуролли кучларининг Ғарб техникаси билан қуролланган 9-армия корпуси Россиянинг мустаҳкамланган мудофааси билан тўқнашганида бошланди ва фақат чекланган муваффақиятга эриша олди”, — дейилади хабарда.
Кейинги босқич асосан пиёда қўшинларининг ҳужумларидан иборат бўлиб, Украина ассиметрик уруш усулларидан фойдаланган ҳолда (яъни Россия армиясининг камчиликларидан фойдаланиб) русларга нисбатан устунликка эга бўлишга ҳаракат қилди. Бироқ бу ҳам сезиларли тараққиётга олиб келмади.
“Ўтган ҳафта Украина Қуролли кучлари 10-армия корпусини танклар ва зирҳли техникалар ёрдамида жанг майдонига юборишга қарор қилди, бу эса жанговар ҳаракатларнинг кескин кучайишига олиб келди”, — дейилади хабарда.
Фронтга ташриф буюрган ҳарбий таҳлилчи Роб Лига кўра, “урушнинг сўнгги ҳафтаси муҳим, чунки Украина ўз қўшинларининг иккинчи эшелонидан кўпроқ фойдаланишга қарор қилди.
“Россия кучлари етарлича талафот кўргани ёки йўқлиги ҳозирча аниқ эмас. Ушбу босқичда биз кутамиз ва кузатамиз”, — деди таҳлилчи.
Нашр журналистлари билан суҳбатлашган украиналик ҳарбийлардан бири бўлаётган воқеаларни секин ва чарчатувчи илгарилаш деб таърифлади.
“Биз доимий равишда Работинода ўз ўрнимизни эгаллашга ва бир қатор тўсиқларни енгиб ўтишга ҳаракат қиламиз. Бизнинг артиллериямизга зарба беришда дронлардан фойдаланаётган рус қўшинлари учун об-ҳаво шароити қулай”, — дея таъкидлади у.
Изоҳ (0)