Болгария ҳукумати мамлакат Ички ишлар вазирлиги ва Украина Мудофаа вазирлиги ўртасида зирҳли транспорт воситаларини етказиб бериш бўйича келишув лойиҳасини маъқуллади. Бу ҳақда Болгариянинг БТА агентлиги хабар бермоқда.
Болгария ички ишлар вазири Калин Стояновга музокаралар олиб бориш ва тегишли ҳужжатни имзолаш топширилди.
БТА аниқлик киритишича, гап ҳозирда Ички ишлар вазирлиги фойдаланмаётган зирҳли транспорт воситаларини етказиб бериш ҳақида бормоқда. Захирада турган бронетранспортёрлар сони 100 га яқин.
Агентлик маълумотларига кўра, келишувларга Украина президенти Владимир Зеленскийнинг июль ойида Болгарияга ташрифи чоғида эришилган.
БТА қайд этишича, Украинага топшириладиган зирҳли машиналар Болгария Ички ишлар вазирлиги эҳтиёжлари учун эскирган деб топилган. Бундан ташқари, сўнгги 25 йил ичида уларни сақлаш бюджетдан катта молиявий харажатларни талаб қилган.
Июнь ойи охирида Болгария мудофаа вазири Тодор Тагарев мамлакат Европа Иттифоқининг Киевни қурол-яроғ билан таъминлаш ташаббусига қўшилишни режалаштираётганини айтди. Ушбу келишув доирасида мамлакатлар Украинага жўнатиш ёки захираларини тўлдириш учун биргаликда ўқ-дориларни сотиб олади. Бунгача мамлакат Киевга тоғридан-тўғри қурол етказиб бермаган эди.
Изоҳ (0)