Дунё бўйлаб 100 дан ортиқ тиббий журнал ядровий қуролни тақиқлашга чақирди.
“Хавф катта ва тобора кучайиб бормоқда. Ядровий давлатлар ўз ядро арсеналларини улар бизни йўқ қилишидан олдин йўқотиши керак”, — дейилади 11 та етакчи тиббий журнал, жумладан, British Medical Journal, The Lancet вa Journal of the American Medical Association чиқарган қўшма баёнотда.
Мурожаат муаллифлари бутун дунё шифокорларини фуқаролар ва сиёсатчиларни “ядро қуролининг аҳоли саломатлиги учун катта хавфидан” огоҳлантиришга чақирди. Ҳужжат Россиянинг Украинага қарши урушда ядро қуролидан фойдаланиш ҳақидаги таҳдидлари ва Шимолий Кореяда давом этаётган ракета синовлари фонида оммага эълон қилинди.
Бутунжаҳон тиббий муҳаррирлар ассоциацияси (WAME) таъкидлашича, эксклюзив контент учун одатда бир-бири билан рақобатлашадиган нашрларнинг ушбу қўшма мурожаат учун бирлашгани эътиборга молик.
“Бу ҳозирги ядровий инқирознинг ўта оғирлигини таъкидлайди”, — деди WAME вакиллари.
Мақолада таъкидланишича, дунё бўйлаб 13 мингта ядро каллагидан атиги 250 таси қўлланса, 120 миллион киши ҳалок бўлади ва глобал иқлим бузилиши юз беради, бу эса ядровий очарчилик ва яна икки миллиард одамнинг ўлимига олиб келади.
Мақола 1970 йилда кучга кирган Ядро қуролини тарқатмаслик тўғрисидаги шартнома бажарилишини назорат қилиш бўйича конференция ташкил этиш қўмитасининг Венадаги йиғилиши олдидан чоп этилган.
Изоҳ (0)