Украина бош вазири Қуролли Кучларнинг йиллик харажати қанча эканини маълум қилди

Украина қўшинларининг йиллик харажати 2 триллион гривнага (деярли 55 миллиард доллар) тенг, деди Бош вазир Денис Шмигал.

“Қуролли кучлар ва урушга сарфланадиган маблағ йилига 2 триллион гривнага яқин. Бу тинчлик давридаги бюджетнинг даромад қисмидан ҳам кўпроқ”, — дея Шмигалнинг сўзларидан иқтибос келтирди Ukrinform агентлиги. Унинг сўзларига кўра, ҳозирда давлат ҳамкорларнинг молиявий кўмаги, шунингдек, грант ва кредитлар ҳисобидан ўзини ушлаб турибди.

Аввалроқ Олий Рада Бюджет қўмитаси раиси Роксолана Пидласа жорий йилда Украина бюджетини молиялаштириш учун халқаро ҳамкорлардан 25,3 миллиард доллар ташқи ёрдам жалб қилингани, бу барча даромадларнинг 49,1 фоизини ташкил этишини маълум қилганди.

Украина парламенти 2023 йилги давлат бюджетини 1 триллион 296 миллион гривна (35,1 миллиард доллар) дефицит билан қабул қилди. Бош вазир Денис Шмигалнинг таъкидлашича, 2023 йилги давлат бюджети лойиҳасида даромадлар 1,28 триллион гривна (тахминан 34,6 миллиард доллар), харажатлар 2,57 триллион гривна (тахминан 69,6 миллиард доллар), ойлик бюджет тақчиллиги 3 миллиард долларга баҳоланмоқда. Украина бу тақчилликни ташқи қарзлар билан қоплаш ниятида.