“Дарё”да “ ‘Маҳалла номи Нилуфармиш, зимистон маҳалла дейиш керак’. Сергелида яшовчи аҳоли электр таъминотидаги узилишлардан шикоят қилди”, сарлавҳали мақола эълон қилинганди. Мазкур муаммога муносабат билдирган “Ҳудудий электр тармоқлари” АЖнинг Тошкент шаҳар филиали Сергелидаги муаммони тан олди ва ҳолат қачон яхшиланганига аниқлик киритди.
Қайд этилишича, аҳоли томонидан айтилган муаммо ўша куни видео ёзиб олинганидан сўнг, 10 дақиқа ўтгач, ҳал этилган.
Аномал иссиқ натижасида айрим жойлардаги трансформатор пунктлари ҳамда кабел тармоқларида истеъмол юкламаси ортиши натижасида аварияли узилиш ҳолатлари юзага келмоқда. Хусусан, жорий йилнинг 31 июль куни соат 20:30 дан 22:15 гача Сергели тумани “Нилуфар” маҳалласи ҳудудини электр энергияси билан таминловчи РП “Фурқат” тақсимлаш пунктидан чиқувчи “фидер надёжний” узатмасидан таъминланувчи ерости юқори кучланишли электр узатиш кабел тармоғининг мойли ўчиргичи шикастланиши натижасида авария ҳолатида узилиш содир бўлган. Шу куннинг ўзидаёқ Сергели ТЭТнинг тезкор бригада ходимлари томонидан авариявий ҳолатлар ва камчиликлар бартараф этилган. Айни вақтда мазкур ҳудуднинг электр таъминоти меъёрий схема бўйича узатилмоқда ва электр таъминоти тўлиқ таминланган, — дейилади масъуллар изоҳида.
“Дарё”даги мақолада мурожаатчининг “Мана, соат кечки 10:05 бўлдики, Сергели-2 да ҳали ҳам ‘свет’ йўқ. Ҳамма ёқ зим-зиё, қоп-қоронғи. Икки-уч соатдан бери ‘свет’ йўқ. Келяпти, ўчяпти, яна келяпти, ўчяпти. Техникалар куйяпти. Бунга кимдир жавоб берадими? Нега Сергели туман ‘рес’ининг бошлиғи, мундоқ эплаб ишини қилолмаяпти? Ҳамма ёқ зим-зиё мана. Кўчада фақат машина чироғи ёнса, кўча кўриняпти. Бўлмаса, кўча ҳам кўринмайди. Йўлнинг нариги томонидаги уйларда ‘свет’ бор. Бу ёқда, Сергели-2 ‘Нилуфар’ маҳалласида ‘свет’ йўқ. Маҳалланинг номи тағинам Нилуфармиш, зимистон маҳалла дейиш керак”, — деган иддаолари ёзилганди.
Изоҳ (0)