Навоий вилояти ҳокимлиги Навоий шаҳрида атмосфера ҳавосининг бузилгани ҳолатининг сабаблари ва уни бартараф этиш юзасидан кўрилаётган чора-тадбирлар юзасидан расмий баёнот берди.
Маълум қилинишича, 30 июль куни соат 14:20 лар атрофида Навоий вилояти Кармана тумани “Янги ариқ” МФЙ ҳудудида жойлашган “Бережливост” хусусий ишлаб чиқариш корхонасига тегишли қаттиқ маиший чиқиндиларни тўплаш полигонида ёнғин келиб чиққан.
Ушбу ҳолат шу куннинг ўзида Навоий вилояти Экология, атроф-муҳитни муҳофаза қилиш ва иқлим ўзгариши бошқармаси давлат инспекторлари, ИИБ, Фавқулодда вазиятлар бошқармаси ҳамда бошқа мутасадди ташкилотлар ҳамкорлигида воқеа жойига бориб ўрганилган.
Шу куннинг ўзида масалари бартараф этишга 50 та турли техника ҳамда 150 нафар ходим сафарбар қилинган ҳамда ўчириш ва чиқиндиларни тўлиқ кўмиш ишлари ҳозир ҳам давом этмоқда.
“Вазият доимий назоратга олинган ва тўлиқ бартараф этилгандан кейин қўшимча маълумот берилади”, — дейилади хабарда.
“Бережливост” хусусий ишлаб чиқариш корхонасига тегишли мазкур чиқинди полигонида 2023 йил апрель ойида охирида ҳамда 2021 йил 18 июнь куни ҳам ёнғин содир бўлганди.
Изоҳ (0)