Қорақалпоғистон Республикаси ва Қашқадарё вилоятида ҳайдовчилик гувоҳномалари олиб беришни ваъда қилган автомактаб ходимлари ушланди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Тахиатош туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда “А.-22” МЧЖ автомактаби ўқитувчиси Рустам фуқаро Акмални ҳайдовчилик гувоҳномасини олиш учун имтиҳондан ўтказиб бериши эвазига 3,2 миллион сўмни олган вақтида ашёвий далиллар билан ушланган.
Шунингдек, Рустамнинг кўрсатувига асосан давом этган тадбирларда Нукус шаҳридаги “А.” МЧЖ ўқитувчиси Қодир Рустамдан 3,2 миллион сўм ва 4 нафар фуқарога ҳайдовчилик гувоҳномаси олиб бериш учун яна 10,1 миллион сўмни олган вақтида, “А.К.” МЧЖ инструктори Собир Қодирдан 12,5 миллион сўмни олган вақтида ҳамда “А.К.” МЧЖ собиқ раҳбари Н.А. инструктор Собирдан жами 12,5 миллион сўмни олган вақтида ашёвий далиллар билан ушланган.
Шу каби, департаментнинг Когон шаҳар бўлими томонидан ИИБ ва Миллий гвардия ходимлари билан ҳамкорликда ўтказилган тезкор тадбирда Тўхта исмли шахс фуқаро Умарга танишлари ёрдамида ҳайдовчилик гувоҳномаси олиш учун имтиҳондан ўтказиб қўйиши эвазига 500 долларни олган вақтида ашёвий далилар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Апрель охирларида Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)