Сурхондарё вилояти Қумқўрғон туманида ЙПХ инспекторларини тарвуз ўғирлаганликда айбланган фуқаро беш суткага қамалди. Бу ҳақда “Бу кун” информацион дастурида маълум қилинди.
Бир неча кун олдин ижтимоий тармоқларда Қумқўрғон туманида ЙПХ инспекторлари тарвуз ўғирлагани айтилган видео тарқалганди. Вилоят ЙҲХБ ҳолатга муносабат билдириб, воқеа аслида бошқача бўлганини маълум қилган.
Тегишли суриштирув ишлари амалга оширилганда фуқаро ўзига тегишли Labo юкхонасида тарвузларнинг бир нечтаси камайгани ва шу атрофда ЙПХ ходимлари тургани учун уларни ўғирликда айблаганини айтган.
Ҳолат бўйича тўпланган ҳужжатлар Жиноят ишлари бўйича Қумқўрғон судига жўнатилган.
“Бу даражада бўлади деб ўйламагандим. Телефонимда бўлган [видео], гуруҳдагилар уни ижтимоий тармоқларга тарқатган”, — дейди айбланувчи.
Айбланувчи Маъмурий жавобгарлик тўғрисидаги кодекснинг 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) 1-қисми билан айбли деб топилиб, унга нисбатан 5 сутка маъмурий қамоқ жазоси тайинланди.
Март бошларида Қашқадарё вилояти Шаҳрисабз шаҳрида ички ишлар органи ходимининг овқатланиб ўтирган жойига бостириб кириб, тасвирга олган ва ижтимоий тармоқларга тарқатганларга чора кўрилганди. Шунингдек, апрель ойида Тошкентда ички ишлар ходимини ўлдириб, ёқиб юборган 3 эркакка ҳукм ўқилгани тўғрисида хабар берилган эди.
Изоҳ (0)