АҚШ Abrams танкларининг биринчи партиясини Украина фронтига 2023 йил сентябрда етказиб бериши мумкин, деб ёзмоқда Politico.
Нашрнинг масаладан хабардор манбалари маълум қилишича, август ойида АҚШ ҳукумати танклар партиясини Германияга жўнатишни режалаштирган, у ерда техникалар якуний таъмирдан ўтади ва кейин Украинага етказилади.
Суҳбатдошларнинг сўзларига кўра, биринчи партия таркибида олтитадан саккизтагача танк бўлади. Жами ҳисобда АҚШ Киевга 31 та Abrams танкларини етказиб беришни ўйламоқда, бу Украина армиясининг битта танк батальонини ташкил қилади.
Шу билан бирга гап танкларнинг М1А1 эски модели ҳақида кетмоқда, чунки замонавийроқ А2 моделини етказиб бериш бир йил вақт олади, деб таъкидлайди Politico.
Украина қўшинлари танклардан фойдаланишни бошлашдан олдин тахминан 10 ҳафталик машғулотлардан ўтиши керак эди. Машқлар август ойида якунланиши режалаштирилган, деди Politico суҳбатдошларидан бири. Унинг қўшимча қилишича, машғулотлар Германиядаги Графенвер ҳарбий базасида ўтказилмоқда.
25 январь куни АҚШ президенти Жо Байден Abrams танклари Украинага жўнатилишини маълум қилди. Битта техника нархи 10 миллион долларга баҳоланган. Машғулотларга мўлжалланган танклар Германияга май ойида етказиб берилди, ўша ойдан Украина ҳарбийларини уларни бошқаришга ўргатиш бошланди.
Изоҳ (0)