Тошкент вилоятида 2023 йилнинг ўтган олти ойи давомида ОИВ инфекцияси билан касалланган шахслар инфекцияни қасддан ўзга шахсга юқтириш билан боғлиқ 20 та жиноий ҳолат аниқланиб, касаллик тарқалишининг олди олинди. Бу ҳақда вилоят ИИББ ахборот хизмати хабар берди.
Хусусан, Юқори Чирчиқ туманида яшовчи 35 ёшли икки аёл ОИВ касаллиги билан рўйхатда туриб, қонуний огоҳлантирилган бўлишига қарамай июнь ойида 35 ва 53 ёшли шахс билан жинсий алоқада бўлгани ҳамда бу орқали ушбу шахслар ва бошқаларнинг ҳаётини хавф остида қолдирган. Шахслар процессуал ушланган.
Шу каби Ангрен шаҳрида яшовчи 24–43 ёш орасидаги уч нафар аёл ва бир нафар эркак ҳам ОИВ касаллиги билан рўйхатда туриб, қонуний огоҳлантирилган бўлишига қарамай, ўзга шахс билан жинсий алоқада бўлгани аниқланган ва тегишли тартибда ушланган.
Аниқланган барча ҳолатлар юзасидан ушланган шахсларга нисбатан Жиноят кодексининг 113-моддаси (таносил ёки ОИВ касаллиги/ОИTСни тарқатиш) 4-қисми билан жиноят иши қўзғатилиб, тергов ҳаракати олиб борилмоқда.
2023 йил июнь ҳолатига кўра, республикада 48 мингдан ортиқ шахсда ОИВ касаллиги ташхисланган. Сўнгги 5 йилда ОИВ инфекциясига текширувлар сони 700 мингдан 3,5 миллионга ёки 5 баробарга ортган. Ҳукумат томонидан дори воситаларини молиялаштириш 80 фоизни ташкил этган.
Изоҳ (0)