O‘zbekistonda 2030-yilga borib OITS kasalligi yuqishiga to‘liq barham berish maqsad qilingan. Bu haqda Sanitariya-epidemiologik osoyishtalik va jamoat salomatligi qo‘mitasi, Respublika OITSga qarshi kurash markazi mas’ullari ishtirokida o‘tkazilgan matbuot anjumanida ma’lum qilindi.
Qayd etilishicha, hozirgi vaqtda respublikada 48 mingdan ortiq shaxsda OIV kasalligi tashhislangan. So‘nggi 5 yilda OIV infeksiyasiga tekshiruvlar soni 700 mingdan 3,5 millionga yoki 5 barobarga ortgan. Hukumat tomonidan dori vositalarini moliyalashtirish 80 foizni tashkil etgan.
Respublikada OIV infeksiyasini onadan bolaga yuqishiga barham berish uchun har yili bemor onalardan dunyoga kelayotgan (o‘rtacha 600 nafargacha) bolalarni quruq sut aralashmalari bilan uzluksiz ta'minlanmoqda. Buning natijasida 99,7 foiz bolalar sog‘lom bo‘lishiga erishilmoqda.
2030-yilga borib OIV epidemiyasiga barham berish uchun 2025-yilga qadar “95-95-95” strategiyasiga erishish zarur.
“95-95-95” tamoyiliga ko‘ra, OIV yuqtirgan bemorlarning 95 foizi o‘z statusini bilishi, bemorlarning 95 foizi maxsus terapiya bilan qamrab olinishi, bemorlarning 95 foizida virus yuklamasi past darajaga tushishiga 2025-yilgacha erishish va 2030-yilda OITS kasalligining yuqishiga barham berish maqsad qilingan.
2022-yil fevral oyida O‘zbekistonda 45 ming nafar odamlar OITS (SPID) bilan yashab kelayotgani ma’lum qilingandi. Ularning 55 foizi erkaklar, 45 foizi ayollar, 14 foizini esa 18 yoshga to‘lmagan bolalar tashkil etadi. OITS bilan kasallanish ko‘rsatkichi yuqoriligi ichki migratsiya hamda aholi sonining ko‘pligi hisobiga Toshkent shahri hamda Toshkent viloyatiga to‘g‘ri kelmoqda.
Izoh (0)