27 июль куни Халқ депутатлари Тошкент шаҳар кенгашининг навбатдаги сессияси бўлиб ўтди. Унда депутатлар Экология, атроф-муҳитни муҳофаза қилиш ва иқлим ўзгариши бошқармаси томонидан 2023 йилнинг иккинчи яримйиллигида амалга ошириладиган ишларни белгилаб берди.
Унга кўра, Тошкент шаҳри ҳудудларидаги кўп йиллик дарахтларнинг таг қисми бетон қопламалари билан қопланган бўлиб, дарахтларга ҳар хил турдаги тунги ёритиш мосламалари ва реклама баннерларини осиш ҳолатлари бартараф қилинади.
“Яшил макон” умуммиллий лойиҳаси доирасида Тошкент шаҳрида жорий йил давомида қўшимча 26 та яшил жамоат парклари ва яшил боғлар ташкил этилиб, Тошкент шаҳрининг кўкаламзорлаштириш даражаси 28 фоиз бўлиши таъминланади.
Тошкент шаҳар ҳудудида аҳолини хавфли гидрометеорологик ҳодисалардан барвақт огоҳлантириш даражасини ошириш бўйича кузатув станциялари ва постлар сони 2023—2024 йилларда 18 тадан 36 тага етказилади.
Тошкент шаҳри атмосфера ҳавоси ифлосланишининг олдини олиш мақсадида шаҳар ҳудудида бензин ва газ ёқилғисида ҳаракатланаётган транспортлар ҳаракати чекланади, электромобиллардан кенг фойдаланиш жорий қилинади ва уларни тез қувватлантириш шохобчалари ташкил этилади.
Бундан ташқари, 2023 йил сентябрдан бошлаб ҳар йили “22 сентябрь — автомобилсиз кун”, “10 минг қадам пиёда” каби акциялари ўтказилади.
2023 йил давомида 7 та саноат корхоналарида локал тозалаш иншоотлари қурилиши ва реконструкция қилиниши, дастурга киритилган корхоналарда экологик назорат тадбирлари амалга оширилишининг назоратини кучайтириш, кунлик ҳосил бўлаётган 7 миллион 218 минг метр куб ёки йиллик 2 триллион 78 миллиард 784 миллион метр куб ифлосланган оқова сувларнинг атроф-муҳитга тозаланмасдан ташланишининг олди олиниб, очиқ сув ҳавзаларининг сув сифати яхшиланишини таъминлаш кўзда тутилган.
Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси 2023 йил баҳор мавсумида “Яшил макон” умуммиллий лойиҳаси доирасида Тошкент шаҳрида экилган 602 мингта дарахт ва бута кўчатларининг қанчаси суғориш тизими йўқ жойга экилганини аниқлайди.
Изоҳ (1)
Окава сув хакидага статистикани тугирлаб езинглар триллион куб метр сувни Тошкент 100 йилда хам истемол кила олмайди. Тугирлпб куйинглар балки шу литр булса керак! Бу айтаетган ракамингиз 3 та тулган орол денгизи сувидан катта микдорни ташкил этади.