Германиялик олимлар 2023 йилнинг июль ойи инсоният тарихидаги энг иссиқ ой бўлганини аниқлади. Ер юзидаги ўртача ҳарорат саноат давригача бўлган даражадан 1,5 даража кўтарилди, деб ёзмоқда Euronews.
Июль ойида айрим ҳудудларда кузатилган ноодатий ҳарорат:
- Хитойда 52 даража;
- Сардинияда 48,2 даража;
- Жазоирда кечаси 39,6 даража;
- Флоридада денгиз ҳарорати 37,2 даража.
Бу йил январь ойидан бошлаб глобал ҳарорат ҳар ойда ўртача даражадан юқорилаб келмоқда. Июль ойида бу кўрсаткич энг чўққига чиқди. Ушбу тарихий рекорд ҳам қуруқликда, ҳам океанларда кузатилган жазирама тўлқинларига тааллуқли, дейди олимлар.
“Бу даражада иссиқ ҳаво ва қизиган ерусти сувлари бир-биридан “ранг олади”. Биз рекорд даражадаги ҳароратга гувоҳ бўляпмиз, ҳар қачонгидан ҳам иссиқ ҳароратга”, — деди Саманта Бюржесс, Европа Иттифоқининг иқлим ўзгариши бўйича Коперник хизмати директори ўринбосари.
2023 йилнинг бунчалик иссиқ келишига “Эл-Нинё” ҳодисаси ҳам сабаб бўлмоқда.
Ҳали “Эл Нинё” бошлангани йўқ. У кириб келиши билан келгусида янада иссиқ бўлиши кутилмоқда. 2024 йилда ҳарорат бунданда юқори бўлиши кутилмоқда, — дея қўшимча қилди иқлимшунос.
Маълумот учун, “Эл-Нинё” экваториал Тинч океанининг марказий ва шарқий зоналарида сувнинг сирт қатлами ҳарорати аномал даражада ошиши билан тавсифланган табиий ҳодиса. “Эл-Нинё” ҳодисаси 2-7 йилда бир марта содир бўлиб, 9 ойдан 12 ойгача давом этади.
Аввалги иссиқлик рекорди 2019 йилнинг июль ойида ўрнатилган эди, ўшанда ўртача глобал ҳарорат ҳозиргидан 0,2 даража паст бўлган.
Иқлим ўзгаришининг сабаблари қаторида — қазиб олинадиган ёнилғидан кенг фойдаланиш ва бошқа инсон омиллари бор.
Иқлим бўйича халқаро саммитларда дунё етакчилари атмосферага CО2 ва метан ажралишини камайтиришга муваффақ бўлган тақдирда ҳам, инсоният ҳозир бошдан кечираётган иссиқлик ва экстремал об-ҳаво келгусида яна ўнлаб йиллар этади, дейди олимлар.
Изоҳ (0)