Аномал иссиқ фонида Ўзбекистонда соатлик ва кунлик электр энергияси истеъмоли рекорди янгиланди. Энергетика вазирлиги матбуот хизмати электр энергияси истеъмоли 2022 йилнинг ёз ҳамда 2023 йилнинг июнь ойидаги рекорд кўрсаткичларни эълон қилди.
Унга кўра, 2023 йил 26 июлда Республика бўйича электр энергияси истеъмоли 250,7 миллион кВт/соатни ташкил этди. 2022 йилнинг худди шу кунида жами 236,9 миллион кВт/соат электр энергияси ишлатилган бўлиб, кечаги кўрсаткич аввалги йилдагидан 5,8 фоиз ортиқ бўлди. Бундан олдин 2023 йил 12 июль куни Республика бўйича жами истеъмол 247,5 миллион кВт/соатни ташкил этиб, рекорд кўрсаткич янгиланган эди.
Шу билан бирга, 26 июль куни электр энергияси истеъмолининг соатлик талаби қарийб 12 300 МВтни ташкил қилди. Бу 2022 йилнинг шу кундаги ҳолатига нисбатан 1 500 МВт (+14,1 фоиз) кўпдир.
2022 йилда максимал электр энергияси истеъмоли 27 июлда қайд этилган бўлиб, бу кўрсаткич 239 миллион кВт/соатни, кундузги истеъмол қуввати 10 800 МВтни ташкил қилган.
Энергетика тизимидаги электр станциялари томонидан кунлик электр энергияси ишлаб чиқариш ҳажми 243,9 миллион кВт/соатни ташкил этди. Бу 2022 йилнинг шу кунги ҳолатига нисбатан 21,5 млн кВт/соат (9,6 фоиз) кўпдир.
Қайд этилишича, Ўзбекистонда кузатилаётган аномал иссиқ об-ҳаво электр узатиш тармоқларининг ўтказувчанлик қобилияти 25 фоизгача пасайишига олиб келади. Бу, биринчи навбатда, тармоқларнинг физик хусусиятларига боғлиқ бўлиб, бундай ҳолларда зарур чора сифатида тармоқда мажбурий чеклов киритилмаса, йирик ҳажмдаги аварияларга сабаб бўлиши ҳеч гап эмас.
“Истеъмолчилардан тармоқда кенг кўламли носозликлар юзага келишининг олдини оладиган, анча узоқ вақт тузатишни талаб қиладиган ҳолгача етиб бормаслик учун қисқа муддатга электр энергиясини узиб туришга тўғри келадиган бундай зарурий чоралар бугун ўта муҳим эканлигини тўғри тушунишларини ва қўллаб-қувватлашларини сўраймиз”, — дейилади хабарда.
Таъкидланишича, қатъий тежамкорликка амал қилиб, зарурат бўлмаган ҳолларда электр асбобларидан фойдаланмаслик орқали фуқаролар тизимда юкламанинг ортишини, авариялар ва узилишларнинг кўплаб содир бўлишини олдини олишга катта ҳисса қўшади.
Изоҳ (1)
To‘g‘ri tushunishga tushunamizkuya. Evi bilan cheklash kerakda. Kun davomida umumiy hisobda 1,5 soat elektr berishayapti. Qanday ishlash mumkin bunday sharoitda. Masalan bugun tushgacha 35 daqiqa, tushdan keyin bo‘lib-bo‘lib 1 soatu 20 daqiqa elektr berishdi. Bu shunchaki insonlarni ustidan kulish, boshqa narsa emas.