O‘zbekistonda 13-iyun kuni kunlik va soatlik elektr iste‘moli bo‘yicha rekord yangilandi, deb xabar bermoqda Energetika vazirligi axborot xizmati.
Unga ko‘ra, 13-iyun kuni mamlakatda jami 231,7 mln kVt/soat elektr energiyasi sarflandi. Bu miqdor iyun oyi uchun rekord ko‘rsatkich hisoblanadi. Bundan bir yil muqaddam xuddi shu kuni 202 million kVt/soat elektr energiyasi ishlatilgan bo‘lib, o‘sish ko‘rsatkichi 14,7 foizni tashkil qilmoqda.
14-iyun kuni soat 11:00 ga qadar esa soatlik ehtiyoj hajmi 11 080 MVtni tashkil qildi. Bu esa 2022-yilning xuddi shu sanasidagi holat bilan taqqoslanganda, 1600 MVt (15,4 foiz) ko‘p elektr toki sarflangan, deganidir. Ushbu quvvat deyarli to‘rtta bug‘-gaz qurilmasining yoki ikkita “To‘raqo‘rg‘on” IESning quvvatiga teng.
Qayd etilishicha, rekord qo‘yish bugun ham davom etib, 14-iyun sanasi mobaynida sutkalik elektr energiyasi iste‘moli 238-239 million kVt/soatga yetishi kutilyapti. Mazkur raqam 2022-yilning mos davrida qayd etilgan iste‘mol miqdoridan qariyb 30 million kVt/soat yoki 14,8 foiz ko‘pdir.
2022-yilning iyul oyida yuz bergan eng anomal issiq haroratli davrda ham maksimal yuklama 10 800 MVtdan, sutkalik maksimal iste‘mol hajmi esa 238,2 million kVt/soatdan oshmagan edi.
Havo haroratining ko‘tarilishi natijasida elektr energiyasiga bo‘lgan talab ham keskin oshadi. Natijada elektr tarmoqlari va transformator punktlarida yuklamalar ortishi, tarmoqda esa turli nosozliklar kelib chiqishi tabiiy. Xususan, anomal issiq elektr tarmoqlarining o‘tkazuvchanlik qobiliyatini ham 20 foiz tushirib, tizimda yo‘qotishlarni hosil qilishi mumkin.
“Aziz vatandoshlar! Respublikamizda havo haroratining anomal darajada isishi natijasida elektr qurilmalarida ortiqcha yuklama tufayli yuzaga kelishi mumkin bo‘lgan nosozliklarning oldini olish maqsadida sizlardan elektr energiyasidan tejamkorlik bilan, shuningdek, sovitish qurilmalaridan ham imkon qadar oqilona foydalanishingizni, zarur bo‘lmaganda, elektr qurilmalarini tarmoqdan ajratib qo‘yishingizni so‘raymiz.
Bu bilan barchamiz nafaqat energiya resurslarini saqlab qolamiz, balki elektr qurilmalarining uzoq muddatga ishdan chiqishini oldini ham olgan bo‘lamiz. Shu orqali energiya resurslari barcha iste‘molchilarga barqaror yetib borishiga munosib hissa qo‘shamiz”, deya aholiga murojaat qilgan Energetika vazirligi
Izoh (0)