Ўзбекистон президентининг фармони билан Озодбек Назарбеков маданият вазири лавозимига тасдиқланди. Бу ҳақда президент матбуот котиби маълум қилди.
Илгарироқ Озодбек Назарбековнинг номзоди Олий Мажлис Қонунчилик палатаси депутатлари томонидан маъқулланган эди.
Олий Мажлис Қонунчилик палатаси матбуот хизматига кўра, мажлисда Озодбек Назарбеков маданият соҳасидаги ислоҳотларнинг самарадорлигини таъминлаш мақсадида келгусида амалга ошириладиган ишлари бўйича ўз Ҳаракатлар дастури ҳақида ахборот берган.
Озодбек Назарбеков 2020 йил 22 январь куни Олий Мажлис Қонунчилик палатаси томонидан Ўзбекистон маданият вазири лавозимига маъқулланган, 24 январь куни эса Президент томонидан тасдиқланган эди. У бунгача маданият вазирининг биринчи ўринбосари эди.
2022 йил декабрда президентнинг “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармони билан мамлакатдаги вазирликлар сони қисқартирилган эди. Ўшанда Маданият ва Туризм вазирликлари қўшиб юборилган ва Озодбек Назарбеков унга раҳбар этиб тайинланганди.
Изоҳ (0)