Жорий йил якунигача инфляция даражаси 8,5—9,5 фоиз бўлиши прогноз қилинмоқда— Марказий банк

2023 йил якуни бўйича инфляция даражаси 8,5—9,5 фоиз атрофида бўлиши борасидаги прогнозлар ўзгаришсиз қолди. Бу ҳақда Марказий банк маълум қилди.

Жорий йил якуни бўйича инфляция даражаси макроиқтисодий ривожланишнинг базавий сценарийси доирасида шаклланиб, бу борадаги прогнозлар ўзгаришсиз қолдирилди.

“Умумий инфляция йил бошидан пасаювчи динамикани намоён этиб, июнь ойида йиллик 9 фоизни ташкил қилди. Бунда, ўтган йилги юқори база эффекти таъсирлари тугаб бориши, импорт товарлари ва тартибга солинадиган нархлар нисбатан барқарор бўлгани асосий пасайтирувчи омиллардан бўлди. Хизматларга бўлган юқори талабнинг сақланиб қолиши ҳисобига хизматлар инфляциясида сезиларли пасайиш кузатилмади”, — дейилади Марказий банк хабарида.

Аҳоли ва тадбиркорларнинг инфляцион кутилмалари ҳам пасайиб, июнь ойида 13—13,5 фоизни ташкил қилган. Бунда инфляцион кутилмаларнинг асосий омиллари қаторида валюта курси ўзгариши, иш ҳақи ва нафақалар ошишини кутаётган респондентлар улуши ортган.

Иқтисодий ўсиш суръатлари жорий йил биринчи ярим йиллигида 5,6 фоизни ташкил қилиб, ўтган йилнинг мос даврига нисбатан юқори суръатларни қайд этган. Кредитлаш суръатларининг тезлашиши, бюджет харажатларининг ортиб бориши, хусусан, иш ҳақи ва нафақаларнинг оширилиши иқтисодий фаолликни қўллаб-қувватловчи асосий омиллардан бўлмоқда.

“Янгиланган прогнозларга кўра, ташқи иқтисодий шароитларга иқтисодиётнинг мослашувини давом этаётгани ва айрим ноаниқликлар сақланиб қолаётганини ҳисобга олиб, 2023 йил якунлари бўйича реал ялпи ички маҳсулот ўсиши 5,0—6,0 фоиз атрофида бўлиши кутилмоқда. Бунда, аҳоли даромадлари ошиши, фискал рағбатлар ва хизматлар соҳасидаги фаолликнинг юқорилиги иқтисодий ўсишнинг асосий қўллаб-қувватловчи драйверлари бўлади”, — дея маълум қилган регулятор.

Келгуси даврларда базавий инфляция прогнози ва инфляцион кутилмаларнинг ишончли пасайиш траекториясига ўтиши асосий ставкани пасайтириш имкониятларини янада оширади.

Аввалроқ Марказий банк бошқаруви 2023 йил 27 июлдаги йиғилишда асосий ставкани йиллик 14 фоиз даражасида ўзгаришсиз қолдиргани хабар қилинганди.