Markaziy bank boshqaruvi 2023-yil 27-iyuldagi yig‘ilishda asosiy stavkani yillik 14 foiz darajasida o‘zgarishsiz qoldirish to‘g‘risida qaror qabul qildi. Bu haqda bank matbuot xizmati xabar qildi.
Regulyatorning qayd etishicha, inflyatsiya va inflyatsion kutilmalarning pasayishiga qaramasdan, narxlarga talab omillari bilan bog‘liq bosimlarning saqlanib qolayotganini inobatga olib, yil yakuniga qadar inflyatsiyaning prognoz doirasida bo‘lishini taʼminlash maqsadida asosiy stavka o‘zgarishsiz qoldirilgan.
Umumiy inflyatsiya yil boshidan pasayuvchi dinamikani namoyon etib, iyun oyida yillik 9 foizni tashkil qilgan. Bunda, o‘tgan yilgi yuqori baza effekti taʼsirlari tugab borishi, import tovarlari va tartibga solinadigan narxlar nisbatan barqaror bo‘lganligi asosiy pasaytiruvchi omillardan bo‘ldi. Xizmatlarga bo‘lgan yuqori talabning saqlanib qolishi hisobiga xizmatlar inflyatsiyasida sezilarli pasayish kuzatilmagan.
Maʼmuriy va mavsumiy omillarning narxlarga taʼsirisiz hisoblangan bazaviy inflyatsiya kutilganidan ko‘ra sekinroq pasaydi va iyun oyida 11,3 foizni tashkil etgan. Natijada, bazaviy inflyatsiya va umumiy inflyatsiya o‘rtasidagi tafovutning oshib borishi kuzatilmoqda. O‘rtacha yillik inflyatsiya ham joriy inflyatsiyadan yuqori shakllangan.
Bu holat narxlar shakllanishida fundamental talab omillari taʼsiri saqlanib qolayotgani, isteʼmol bozorlaridagi talab va taklifning to‘liq muvozanatlashmaganini ko‘rsatmoqda va isteʼmol savatida narxlari 10 foizdan yuqori oshgan tovar va xizmatlar ulushining yuqoriligida ham namoyon bo‘lmoqda.
Markaziy bank boshqaruvining 2023-yil 26-yanvarda bo‘lib o‘tgan yig‘ilishida asosiy stavka yillik 15 foiz darajasida o‘zgarishsiz qoldirilgandi. 2023-yil 16-martda asosiy stavkani yillik 1 foiz bandga pasaytirib, yillik 14 foiz darajasida belgilandi. 4-may kuni asosiy stavka 14 foiz darajasida o‘zgarishsiz qoldirilgandi.
Izoh (0)