Twitter номи Х га ўзгартирилганидан кейин ижтимоий тармоқ эгаси Илон Маск ушбу платформа дунёдаги энг қиммат брендга айланишини айтди.

Бу ҳақда Маск ижтимоий тармоқда мутахассиснинг Twitter номи ўзгариши 40 миллиард доллардан кўпроққа тушиши ҳақидаги сўзларига жавобан ёзди.

“Х Ер юзидаги энг қиммат бренд бўлади. Гапларимни эслаб қолинг”, — деб жавоб берди Маск.

Илон Маскнинг сўзларига кўра, бундан буён Х платформасидаги постлар “твит” эмас, балки “икс” деб номланади.

Маск тез орада ижтимоий тармоққа мураккаб коммуникациялар ва “барча молиявий операциялардан фойдаланиш имкониятини” жорий қилишни ваъда бермоқда. Шунингдек, у келажакда ҳамма нарса учун мўлжалланган Х деб номланувчи янги иловани тақдим қилмоқчи. 

24 июль куни Twitter ўз логотипини кўк қушдан Х ҳарфи тасвирланган белгига ўзгартирди. Маск Twitter номини Х деб ўзгартириш режалари ҳақида 1 июнь куни гапирганди. У келажакда ижтимоий тармоқнинг функсионал имкониятлари кенгайиши, шу сабабли Twitter бренди бунга мос тушмаслигини айтган. Шунингдек, у янгиланадиган платформада эски Twitter’га қараганда узунроқ постлар, видеолар чоп этиш, хабарлар алмашиш ва молиявий хизматлардан фойдаланиш имкони бўлишини маълум қилган.