Ўзбекистонда тўловга қобилиятсизлик соҳасидаги қонунчилик ҳужжатлари такомиллаштирилгани муносабати билан ҳукуматнинг айрим қарорларига ўзгартириш ва қўшимчалар киритилди, деб хабар беради Норма.
Ҳужжат билан суд бошқарувчилари, уларни аттестациядан (қайта аттестациядан) ўтказиш ва малака аттестатини бериш тартиби тўғрисидаги низомга ўзгартириш ва қўшимчалар киритилмоқда.
Суд бошқарувчисининг 1-3 тоифадаги малака аттестатини олиш учун имтиҳондаги энг кам тўғри жавоблар фоизи ўзгармоқда:
- 4-тоифа учун – камида 50 фоиз (ўзгаришсиз);
- 3-тоифа учун – камида 65 фоиз (илгари 60 фоиз);
- 2-тоифа учун – камида 75 фоиз (илгари 70 фоиз);
- 1-тоифа учун – камида 85 фоиз (илгари 75 фоиз);
номзодлар томонидан юқорироқ тоифадаги аттестатни олиш истаги билдирилганда қайта тест топшириш учун қайта мурожаат қилиш муддати белгиланмоқда: биринчи аттестациядан камида 1 ойдан сўнг;
суд бошқарувчилари томонидан белгиланган талаблар бузилганда аттестация томонидан ушбу ҳолатларни кўриб чиқиш тартиби белгиланмоқда.
Қуйидаги ҳолатлар ишни кўриб чиқиш учун асос этиб белгиланмоқда:
- Давлат активларини бошқариш агентлиги ва унинг ҳудудий органларининг суд бошқарувчиси фаолиятида аниқланган ҳуқуқбузарлик аломатлари тўғрисида маълумотнома ва текшириш далолатномалари;
- давлат бошқаруви органлари, маҳаллий ҳокимият органларининг маълумотлари, жисмоний ва юридик шахсларнинг ариза ва шикоятлари, ОАВдаги маълумотлар;
- суд ва ҳуқуқни муҳофазаа қилувчи органларнинг суд бошқарувчиси томонидан ҳуқуқбузарликка йўл қўйилгани ҳақида маълумот, тақдимнома, ажрим.
Ишни кўриб чиқиш натижаси бўйича комиссия қарор қабул қилиб Давактив агентлигига юборади.
Қарорга асосан Давактив агентлиги суд бошқарувчисига камчиликларни бартараф этиш учун бир ойлик (бир ойгача узайтириш имконияти мавжуд) муҳлат беради ёки аттестатни тўхтатиб туриш ёхуд тўхтатиш ҳақида қарор қабул қилади.
Шунингдек, сохта банкротлик, банкротликни яшириш ва қасддан банкротликка олиб келиш аломатларини аниқлаш қоидаларига ўзгартириш киритилмоқда. Унга кўра, агарда қарздор сўнгги 2 йил ичида фаолият юритмаган бўлса, суд бошқарувчиси томонидан қарздорнинг молия хўжалик фаолияти юритган даврдаги 2 йиллик фаолияти таҳлил қилинади.
Ҳужжат қонун ҳужжатлари маълумотлари миллий базасида эълон қилинган ва 22 июлдан кучга кирди.
Изоҳ (0)