Наманган вилоятида аёлдан шахсий маълумотларини тарқатиш билан қўрқитиб, пул талаб қилган эркакнинг товламачилигига чек қўйилди. Бу ҳақда ИИВ ТҚД Киберхавфсизлик маркази хабар берди.
Қайд этилишича, Тўрақўрғон туманида яшовчи О.Г. исмли 23 ёшли аёл ИИОга мурожаат қилиб, номаълум шахс сир сақланиши лозим бўлган маълумотларини ошкор қилиш билан қўрқитиб, ундан пул талаб қилаётганини маълум қилган.
Тезкор-қидирув тадбирлари натижасида, мазкур жиноятни Наманган шаҳрида яшовчи 21 ёшли (эркак) М.А. содир этгани аниқланган.
Гумонланувчи М.А. Наманган тумани “Қўқонқишлоқ” МФЙ ҳудудида О.Г.нинг уяли телефон қурилмасини очиқдан очиқ тортиб олиб, агар 1 миллион сўм пул бермаса, унинг Telegram мессенжеридаги шахсий ёзишмалари ва суратларини интернет тармоғи орқали барчага тарқатишини айтиб, пўписа қилгани маълум бўлган.
Мазкур ҳолат юзасидан Жиноят кодексининг 165-моддаси (товламачилик) 1-қисми билан жиноят иши қўзғатилиб, М.А.нинг содир этилиб, фош этилмай қолган бошқа шу турдаги жиноятларга алоқадорлигини текшириш мақсадида тезкор-суриштирув ишлари олиб борилмоқда.
Март охирларида Андижонда талаба қизнинг шахсий суратларини ижтимоий тармоқларда тарқатмаслик учун пул талаб қилган шахс ушлангани, шунингдек, Самарқандда эркак “Одноклассники”да танишган аёлнинг суратларини монтаж қилиб, тарқатиш билан таҳдид қилгани тўғрисида хабар берилганди.
Изоҳ (0)