Қарши давлат университетини қуёш панеллари билан таъминлаш ойига 153 миллион сўм пулни тежаб, йилига 734 миллион сўм даромад қилиш имконини яратди. Бу ҳақда “Дарё”га муассаса ахборот хизмати раҳбари Ойбек Юсупов хабар берди.
Таъкидланишича, ОТМда қуёш панелларини ўрнатиш ишлари якунланган.
“Бугун юртимизда иқтисодиёт тармоқлари, ижтимоий соҳа объектлари ҳамда аҳоли турар жойларида муқобил энергиядан фойдаланиш борасида қатор устувор лойиҳалар амалга оширилмоқда. Давлатимиз раҳбарининг жорий йил 16 февралдаги ‘2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида’ги қарори эса мамлакатимизда энергия тақчиллиги қопланишини таъминлашга қаратилган муҳим ҳужжат бўлди. Қайта тикланувчи энергия манбаларини ва энергия тежовчи технологияларни жорий этиш борасида Қарши давлат университетида ҳам кенг кўламдаги ишлар амалга ошириляпти. Хусусан, олий таълим муассасасида ҳозирги кунга қадар жами 910 кВт/соат электр энергияси ишлаб чиқарувчи қуёш панеллари ўрнатилди. Шундан фойдаланишга яроқсиз, шўрланиш даражаси юқори, собиқ чиқиндихона жойлашган ер майдонида бунёд этилган гелиополигонда 510 кВт/соат қувватли қуёш панеллари ўрнатилди”, — дейди Ойбек Юсупов.
Қўшимча қилинишича, эндиликда университетнинг барча бинолари қуёш панеллари орқали ишлаб чиқариладиган электр энергияси билан таъминланмоқда.
“Натижада бир ойда 152 880 кВт электр энергияси ишлаб чиқарилиб, 152 миллион 880 минг сўм маблағ тежашга эришилди. Шунингдек, ҳозирда соатига 254,8 кВт ортиқча ишлаб чиқарилган электр энергиясини Қарши шаҳар электр тармоқлари корхонасига сотиш бўйича шартнома имзолаш жараёнлари кетмоқда. Натижада бир ойда 61 миллион 152 минг сўм (61 152 кВт) ва бир йилда қарийб 734 миллион сўм (733 824 кВт) даромад олиш имконияти яратилади”, — дейди масъул.
Қўшимча қилинишича, олийгоҳ ҳудудида 89 дона 200 Ватт қувватга эга қуёш панелли тунги ёритгичлар ҳам ўрнатилган.
Изоҳ (0)