Хоразм вилояти Хива шаҳрида жойлашган бозорда йирик ёнғин чиққани ҳақида хабар берилган эди. ФВВ ахборот хизматининг маълум қилишича, ёнғин бартараф этилган.
Унга кўра, “Хива Универсал кийим-кечак бозори” ҳудудида содир бўлган ёнғин соат 19:25 да ўраб олиниб, соат 20:10 да бартараф этилди. Ёнғин натижасида тахминан 1000 кв.м майдонда контейнер ва енгил типдаги савдо расталари ёниб зарарланган.
Ёнғинни бартараф этишга 12 та ёнғин-қутқарув экипажи ва 9 та сув ташишга мўлжалланган автомобиллар жалб этилган. Ҳодиса оқибатида фуқароларни куйиш тан-жароҳатини олиш ва ҳалок бўлиш ҳолатлари тўғрисида маълумотлар келиб тушмади.
Ҳозирда ёнғин сабаби ва моддий зарар миқдори аниқланмоқда. Воқеа жойига вилоят ҳамда туман ФВБ раҳбар ходимлари етиб борган.
Изоҳ (0)