30-may kuni ertalab Moskvaga dronlar hujum qildi. Bu haqda poytaxt meri Sergey Sobyanin ma’lum qildi. Uning so‘zlariga ko‘ra, bir nechta binolarga “kichik zarar yetgan”.

“Shahardagi barcha favqulodda xizmatlar voqea joyida ishlamoqda. Ular hodisa tafsilotlarini o‘rganishmoqda. Ayni vaqtda hech kim jiddiy shikastlanmagan. Sizdan faqat rasmiy manbalarga tayanish va tasdiqlanmagan ma’lumotlarni tarqatmaslikni so‘rayman”, — deyiladi shahar merining xabarida.

Sobyanin, shuningdek, xavfsizlik nuqtayi nazaridan dron urilgan ikki uyning bir nechta podyezdlaridagi aholi favqulodda xizmatlar davomida evakuatsiya qilinganini aytdi. Dronlar aynan qayerdagi uylarga zarar yetkazganiga Moskva meri aniqlik kiritmadi.

Moskva viloyati gubernatori Andrey Vorobyov Moskvaga yaqinlashayotgan bir nechta uchuvchisiz uchoqlar urib tushirilganini aytdi. Uning ta’kidlashicha, ertalab viloyatning ayrim hududlari aholisi portlash ovozlarini eshitgan, havo hujumidan mudofaa tizimi ishga tushgan.

Baza xabariga ko‘ra, Moskva viloyatida o‘ndan ortiq dron urib tushirilgan, ularning aksariyati — Istra, Krasnogorsk va Odintsovo tumanlarida.