Мисрдан C гепатитига қарши дори воситаларининг ўн биринчи туркуми Ўзбекистонга юборилди, деб хабар бермоқда “Дунё” ахборот агентлиги.
Унга кўра, президентнинг 20—21 февраль кунлари Мисрга буюрган расмий ташрифи давомида эришилган келишувлар ҳамда мамлакат раҳбарининг Гепатит C касаллигини юз фоиз давлат ҳисобидан даволаш бўйича сайловолди ташаббуси ижроси доирасида Миср Соғлиқни сақлаш вазирлиги билан олиб борилган музокаралар натижасида Ўзбекистонга инсонпарварлик ёрдами сифатида ажратилаётган гепатит C вирусига қарши “Даклатасвир” дори воситаларининг навбатдаги туркуми мамлакатга юборилди.
Uzbekistan Airways авиакомпанияси ушбу инсонпарварлик кўмагининг навбатдаги ўн биринчи туркумини Шарм аш-Шайхдан Тошкентга етказиб берди. Ушбу дори воситалари Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморлар ўртасида тақсимланади.
Миср гепатит B ва C вирусларига қарши курашда дунё миқёсида сезиларли муваффақиятларга эришган. Миср Соғлиқни сақлаш вазирлиги маълумотларига кўра, мамлакат аҳолиси ушбу касалликдан бутунлай халос бўлган. Миср соғлиқни сақлаш вазири Халид Абдуғаффор жорий йил 21—30 май кунлари Женева шаҳрида бўлиб ўтган Жаҳон соғлиқни сақлаш ташкилотининг 76-сессиясида бу ҳақда маълум қилган эди.
Ушбу мамлакатда C гепатити вирусига батамом барҳам берилгани тўғрисидаги шаҳодатнома Жаҳон соғлиқни сақлаш ташкилоти томонидан Миср ҳукуматига тақдим этилиши кутилмоқда. Кўп йиллар давомида ушбу касалликдан азият чеккан Миср бу касалликни енгишга муваффақ бўлган дунёдаги биринчи давлатга айланади.
Изоҳ (0)