Ўзбекистондаги барча умумтаълим мактабларининг компьютер синфхоналарини қайта жиҳозлашга доир хатлов жараёнлари бошланди, деб хабар бермоқда Мактабгача ва мактаб таълими вазирлиги матбуот хизмати.
Президентнинг 2023 йил 26 майдаги фармонига мувофиқ, янги ўқув йилидан бошлаб умумий ўрта таълим муассасаларининг бошланғич синфларида информатика фани, хусусан, 1-синфдан информатика ва ахборот технологиялари фани ўқитилиши белгиланган. Вазирлик матбуот хизмати хабарида қайд этилишича, мазкур вазифалар ижросини таъминлаш мақсадида барча умумтаълим мактабларининг компьютер синфхоналарини қайта жиҳозлашга доир хатлов жараёнлари бошланди.
Мактабгача ва мактаб таълими вазирлиги масъул ходимлари томонидан олиб борилаётган ўрганишлар давомида компьютер синфхоналарининг моддий-техник базаси кўздан кечирилади. Якуний хулосалар асосида тегишли мактаблар замонавий компьютер жиҳозлари билан тўлиқ таъминланади.
Жумладан, Тошкент шаҳридаги мактабларнинг барча компьютер хоналари ҳам хатловдан ўтказилиб, мавжуд 335 та мактабдан 258 тасида компьютер жиҳозларига эҳтиёж мавжудлиги аниқланган.
Ушбу эҳтиёжни қоплаш мақсадида Мактабгача ва мактаб таълими вазирлиги томонидан мактабларга 304 дона компьютер синфхоналари тўплами жўнатилмоқда. Ҳар бир тўплам 16 та компьютер, 1 дона принтер, кондиционер, интерактив доска ва сервердан ташкил топган.
Республиканинг бошқа ҳудудларига ҳам компьютерлар босқичма-босқич тарзда етказиб берилади.
Изоҳ (0)