“Ҳаракати, илми, ҳунари йўқ одам камбағал бўлади”— депутат Алишер Қодиров ёзган твит муҳокамаларга сабаб бўлди

Депутат Алишер Қодиров Twitter’даги саҳифасида ёзган ҳаракати, илми, ҳунари йўқ одам камбағал бўлиши ҳақидаги твит муҳокамаларга сабаб бўлди.

Алишер Қодировнинг фикрича, камбағаллик мағлубиятга розиликни англатади.

“Ўзбекистонда камбағаллик йўқ деб узоқ йиллар ўзимизни алдаб келдик. 7 йил аввал, халқаро мезонларга кўра Ўзбекистонда 34 фоиз аҳоли камбағал эди, 2023 йилда бу кўрсаткич 14 фоизгача қисқарибди. Халқаро мезонлар ўз йўлига, камбағаллик – мағлубиятга розилик, деб ўйлайман.

Ким камбағал бўлади? Биринчи навбатда ҳаракати йўқ, илми йўқ, ҳунари йўқ одам камбағал бўлади! Кимдир ҳаёти давомида имконият изласа, кимдир айбдор излайди. Менимча, давлат қанча ҳаракат қилмасин, мағлублар камбағал бўлиб қолаверади”, — деб ёзган у.

Иқтисодчи Отабек Бакиров депутат фикрига муносабат билдириб, инсон ўзига боғлиқ бўлмаган ҳолларда ҳам камбағал бўлиши мумкинилигига ишора қилди.

“Одам ўзига боғлиқ бўлмаган равишда отадан, онадан, боқувчидан ажралиб қолиши, ногирон ё чекланган имкониятлар билан туғилиши, ногирон ё касал бўлиб қолиши мумкин, жаноб Қодир. Узр, чидаб туролмадим. Мен мамлакат бойликларини бир тўп тўда эгаллаб олиб, миллионлаб одамларни қашшоқлаштираётгани, бюджетни ўз фойдасига тақсимлаб, мактабни, тиббиётни хароб қилиш орқали авлоддан авлодга ўтадиган қашшоқлаштиришни бойлик тўплаш воситасига айлантирилганини гапирмаяпман”, — деб ёзди иқтисодчи.

Депутат Дониёр Ғаниев ҳам Алишер Қодиров фикрларига ўз муносабатини билдирди.

“Тўғри, илми, ҳунари йўқ, дангаса одам камбағал бўлиши мумкин. Лекин бу ҳамма камбағал шундай дегани эмас. Худди аҳмоқ одамлар ҳам депутат бўлиши мумкин, лекин бу ҳамма депутат аҳмоқлигини англатмагандек. Нобел совриндорлари А.Банержее ва Э.Дуфлонинг (‘Поор эcономиcс’) фикрича, одамлар меҳнат қилмагани учун эмас, балки кўп ҳолларда ‘камбағаллик қопқони’ (очлик, касаллик, ишсизлик, таълим ололмаслик)га тушиб қолиши ортидан қашшоқликдан чиқолмайди”, — дея фикр билдирган депутат.

Блогер Зафарбек Солижонов Дониёр Ғаниевнинг Twitter’даги фикрлари акс этган скриншотни Telegramдаги каналида жойлаб: “Дониёр Ғаниев менинг депутатим ва фахрим”, — дея пост қолдирди.