Ижтимоий тармоқларда одамлар йирик илонлардан қўрқиб қочиб кетаётгани акс этган видео тарқалди. Фойдаланувчилар видеодаги хона Россия Давлат кинематография институтининг (ВГИК) Тошкент филиали аудиторияси эканини ёзишган.
Олийгоҳ воқеага изоҳ берди. Маълум бўлишича, воқеа саҳналаштирилган бўлган. Мазкур саҳна режиссёр Зилола Жўраева томонидан суратга олинаётган “Бадавлат гадойлар” янги телесериали учун суратга олинган.
Лойиҳа “Миллий” телеканали буюртмаси билан ВГИК Тошкент филиали ўқитувчилари ва талабалари иштирокида суратга олинмоқда.
“Сериални суратга олиш жараёнида хавфсизлик чоралари кўрилганини, суратга олиш майдончасида герпетологлар ишлаганини ва қочиш саҳналари саҳналаштирилганини таъкидлаймиз. Жароҳатланганлар йўқ”, — дейилади институт хабарида.
Фойдаланувчилардан бундай провокацион видеоларга берилмаслик, шунингдек, тасдиқланмаган маълумотларни ижтимоий тармоқлар ва мессенжерларда тарқатмаслик сўралган. Шунингдек, ВГИК филиал одатдагидек ишлаётганини, абитуриентлар қабул қилинаётганини қайд этди.
Изоҳ (0)