Президент Шавкат Мирзиёев кеча, 21 июль куни Тошкент шаҳрининг Олмазор туманидаги “Хастимом” маҳалласида бўлди. Давлат раҳбари маҳалладаги хонадонларда бўлиб, аҳолининг яшаш шароитини кўрди. Одамлар билан самимий суҳбатлашди. “Дарё” мухбири президент Шавкат Мирзиёев билан суҳбатда бўлганларни саволга тутди.
Президентимиз билан суҳбатимиз юморга бой бўлди. Уларнинг “бу жин кўчаларда қиз ҳам беролмайсиз, келин ҳам ололмайсиз”, дея “барча шароитларни яратиб берамиз деганлари”, бизга жуда ёқди. Давлат раҳбари ҳар биримиз билан суҳбатлашар экан, “нима муаммо борлигини ўзингизнинг тилингиздан эшитиш учун келдим”, деди. Президентимиз билан суҳбат шу қадар оддий ва самимий эдики, мен ҳатто телевизордаги Саида Раметованинг “Ачовотданми, қизимни бермайман”, деган гапларигача эсладим. Президентимиз бу ҳолатга кулиб, “тўғри айтасиз”, дедилар, — дейди давлат раҳбари билан суҳбатда бўлган Шоҳида Нишонова.
Суҳбатдошнинг айтишича, Шавкат Мирзиёев эски шаҳар аҳолисининг оддий ва самимийлигини, сабрлилигини айтиб, муаммолар ҳақида ҳам сўраган.
Бизнинг кўчамизда канализация тизими йўқлигини, шароитимиз оғир, кўплаб хонадонларда икки-уч нафар келинлари билан сабр қилиб яшаб келаётганини айтдим. Президентимиз бунга жавобан аҳолига шароит яратиб берилишини, айниқса ёшларнинг алоҳида яшашлари учун имконият яратиб берилишини билдирди. Ҳар бир муаммоимизни сабр билан эшитиб, биз билан оддий одамлардек самимий суҳбат қилишларини кўриб, хурсанд бўлдим. Шахсан мен ўзимни бахтли ҳисоблайман. Президент билан суҳбатлашиб, муаммоларимни айтдим. Шу сабабми ҳаяжондан кечаси билан ухлолмай чиқдим, — дейди суҳбатдош.
Шоҳида опанинг айтишича, давлат раҳбарининг эски шаҳарга ташрифи аҳолининг кайфиятини кўтариб, ҳар бир хонадонда байрамона кайфият пайдо бўлишига олиб келган.
Маҳалламизга келган президентимиз йўлма-йўл ҳамма билан бирма-бир сўрашиб чиқди. Нуронийлар билан самимий суҳбат қурди. Бу бизга куч бериб, кайфиятимизни кўтарди, — дейди суҳбатдош.
Президент билан кўришган Исмоғил ота Саидмаҳмудовнинг айтишича, давлат раҳбарининг одамлар билан самимий суҳбати ва ҳар хонадонга кириб, муаммолар ҳақида сўраши бошқа раҳбарларнинг ҳам ижобий хулоса қилишига сабаб бўлиб, уларни халқ билан яқинлаштиради.
Президентимиз маҳалламизга келар экан, энг аввало мени мақтаманг, барчаси ҳақида рўйи-рост гапиринг дея алоҳида урғу берди. Биз ҳам шу сабаб барча гапни очиқ ойдин гапирдик. Суҳбат жуда самимий ва кулгига бой бўлди, — дейди Исмоғил ота Саидмаҳмудов.
Отахоннинг айтишича, давлат раҳбари муаммо ҳақида сўрагач, маҳалла аҳолиси кўчалар жуда торлигини, кичкина уйларда 4-5 та оилалар яшаётганини айтиб, ёрдам сўраган. Президент бунга жавобан маҳалла аҳолиси яшаётган ва хонадон вакиллари рози бўлса, тор жойдаги уйлар бузилиб, янгиланишини айтган. Уйимиз ўзимизга маъқул деганларга эса ўз уйи қолдирилади деган.
“Хастимом” маҳалла фуқаролар йиғини раиси Саноат Яҳёеванинг маълумот беришича, у президент билан мулоқотда Шавкат Мирзиёев Бош вазир бўлган пайтда “Хастимом” мажмуаси қурилишига шахсан ўзи бош-қош бўлганини, ҳудудни ободонлаштиришда у кишининг ҳиссаси катта бўлганини эслатган.
Президентимиз Бош вазир бўлган пайтда “Хастимом” мажмуаси қурилишига шахсан ўзлари бош-қош бўлганди. Мен ўша пайтда маҳалла идорасида котиба бўлиб ишлардим. Ўшанда Шавкат Мирзиёевнинг кечани кеча кундузни кундуз демай ишлашларини, ғайратларини кўриб, яхши хислатларини ўрганганимни айтдим. Аввалдан таниганим, кўрганим, ўша пайтда бирга ишлаганим учунми давлат раҳбари билан суҳбатимиз анчайин самимий бўлди, — дейди МФЙ раиси Саноат Яҳёева.
Президент ахборот хизматининг ёзишича, “Хастимом” маҳалласида 1 минг 500 нафардан зиёд аҳоли яшайди. Уларнинг кўпчилиги ҳунармандчилик ва савдо билан шуғулланади.
Мамлакатимизнинг барча ҳудудларида “Обод маҳалла”, “Обод қишлоқ” дастурлари амалга оширилмоқда. Йўллар, муҳандислик тармоқлари таъмирланиб, хонадонларга файз кирмоқда. Бу маҳаллани ҳам “Обод хонадон” дастури асосида яхшилаш кўзда тутилмоқда, — дейилади президент матбуот хизмати тарқатган хабарда.
Изоҳ (0)