Халқ депутатлари Гулистон тумани Кенгашининг навбатдан ташқари сессияси бўлиб ўтди. Унда ташкилий масала кўрилди, деб хабар беради Сирдарё вилояти ҳокимлиги матбуот хизмати.
Маълум қилинишича, сессияда депутатлар томонидан Ўлмас Мамадаминов номзоди Гулистон тумани ҳокими лавозимига тасдиқланган.
Ўлмас Мамадаминов 1976 йилда Оқолтин туманида туғилган. Мазкур тайинловга қадар вилоят Камбағалликни қисқартириш ва бандлик бош бошқармаси бошлиғи лавозимида фаолият олиб борган.
Шунингдек, Оқолтин тумани ҳокими лавозимига шу кунга қадар Олий Мажлиси Қонунчилик палатаси девони раҳбари вазифасида ишлаб келаётган Комил Эрназаров номзоди тасдиқланган.
Комил Эрназаров 1984 йил Сирдарё туманида туғилган. Меҳнат фаолиятини вилоят молия бошқармасида етакчи иқтисодчи сифатида бошлаб, турли йиллар давомида бошқарма бошлиғи ўринбосари, собиқ Хусусийлаштириш, монополиядан чиқариш ва рақобатни ривожлантириш давлат қўмитасининг вилоят ҳудудий бошқармаси ҳамда вилоят иқтисодиёт бош бошқармаси бошлиғи вазифаларида фаолият юритган.
Бундан олдин Санжар Обидов Тошкент шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари этиб тайинлангани, Урганч шаҳри ҳокими лавозимида ишлаган Шуҳрат Абдуллаев 3 йил муддатга озодликдан маҳрум этилгани тўғрисида хабар берилганди.
Изоҳ (0)