АҚШ собиқ президенти Дональд Трамп устидан махфий ҳужжатларни ноқонуний сақлаш иши бўйича суд жараёни 2024 йил 20 май куни бошланади, деб қарор қилди Флорида штати, Форт-Пирс шаҳар округи судьяси Эйлин Канно. Трампнинг адвокатлари ушбу санага норозилик билдириб, мижозига қарши ҳар қандай суд жараёни 2024 йил ноябрда бўлиб ўтадиган АҚШ президентлик сайловларидан кейингина ўтказилиши кераклигини таъкидлади.
Трамп матбуот котибининг айтишича, суд жараёни учун белгиланган сана “президент Трамп ва унинг юридик жамоасига жиноий ишга қарши курашни давом эттириш имконини беради”.
АҚШ махсус прокурори Жек Смит идорасининг матбуот котиби ҳолатга изоҳ беришдан бош тортди.
Саккиз бандлик айблов
8 июнь куни Трампга саккизта банд бўйича айблов эълон қилинди. Прокуратуранинг фикрича, Трамп ундан махфий ҳужжатларни қайтариб олишга уринган амалдорларга материалларни шахсан ўзи топширмоқчилигини айтиб, ёлғон гапирган. Трамп айбини тан олишдан бош тортди.
Трамп Оқ уйни тарк этаётган вақтда махфий ҳужжатлар солинган ўнлаб қутиларни ўзи билан олиб кетган ва уларни Палм-Бичдаги (Флорида штати) Мар-а-Лаго қароргоҳида сақлаган.
Трамп махфий ҳужжатлар солинган қутиларни уйининг турли жойларида, жумладан, бал ўтказиладиган зал, ювиниш хонаси ва душ, ҳожатхона, ёрдамчисининг хонаси, ётоқхона ва ошхонада сақлаган. АҚШ собиқ президенти махфий ҳужжатлар билан ишлаш қоидаларини бузганликда айбланмоқда.
Трампга қарши яна бир суд жараёни
Келгуси йилнинг 25 март куни Дональд Трамп собиқ актрисанинг жим юриши учун пул тўлаганига оид бир нечта айбловлар бўйича Манхеттендаги судга ҳам чиқиши керак.
Изоҳ (0)