Коррупцияга қарши курашиш агентлиги тадбиркорлик билан шуғулланаётган давлат хизматчилари ҳақида ахборот тарқатиб, Яккасарой тумани ҳокимини Саниcо Group ва “Ув-Макс” МЧЖлар эгаси деб кўрсатди. Ҳокимлик ахборот хизмати эса агентликни ёлғон ахборот тарқатишда айбламоқда.

Мазкур МЧЖлар эгалиги 2023 йилнинг 13 июнь куни ҳоким номидан чиқарилган. Лекин Коррупцияга қарши курашиш агентлиги бу маълумотларни 20 июль куни тарқатмоқда, — дейди Яккасарой тумани ҳокимлиги ахборот хизмати раҳбари Отабек Насимов.

“Дарё” журналисти Коррупцияга қарши курашиш агентлиги ахборот хизмати ходими Феруза Мирзакомилова билан суҳбатлашиб, “тарқатилган маълумотнинг Яккасарой тумани ҳокими билан боғлиқ қисмида хатоликка йўл қўйилмаганми?” деб сўради.

Яккасарой тумани ҳокими номида ҳақиқатда фирма бўлган. Бу аниқланган ҳолат. Ва шунинг учун агентлик томонидан бу ҳолатни бартараф этишга қаратилган тақдимнома киритилган. Маълумотни нотўғри деб энди иддао қилишаётгани бу — фақат ўша тақдимнома асосида фирма таъсисчилигидан чиқарилгани билан боғлиқ, холос. Аниқланган ҳолатлар бўйича мазкур давлат органлари ва ташкилотлари, шунингдек, уларнинг юқори турувчи идораларига агентлик томонидан тегишли тақдимномалар киритилиб, юқоридаги манфаатлар тўқнашуви ҳолатларига барҳам берилиши (мансабдор шахсларнинг тадбиркорлик субъектларидаги фаолияти тугатилиши) чоралари кўрилмоқда, — дейди Феруза Мирзакомилова.

Агентлик ахборот хизмати раҳбари, шунингдек, “Биз берган маълумотда айнан ҳозир ҳам таъсисчи деган фикр борми? Аниқланган ҳолат ҳақида гап кетган”, дейди. У таҳририят сўровига жавобан Яккасарой тумани ҳокимлигига қачон тақдимнома киритилганини аниқлаб беришини қўшимча қилди. Бироқ журналистнинг “ахборотни оммага тарқатишдан аввал тақдимномага кўра, талаб бажарилган ёки бажарилмагани билан қизиқиб кўрганмисизлар?”, деган саволини очиқ қолдирди.