Украина Ташқи ишлар вазирлиги 20 июль куни Қирғизистон элчиси Идрис Қодирқуловни ҳузурига чақиртирди. Бу ҳақда AKIpress хабар берди.
Украина ТИВ маълумотларига кўра, элчи Россияга қарши санкцияларни четлаб ўтиш учун Қирғизистон юрисдикциясидан фойдаланилаётгани ҳақидаги маълумотлар юзасидан тушунтириш олиш учун чақирилган. Гап қурол-яроғ ишлаб чиқаришда қўлланиши мумкин бўлган икки мақсадли маҳсулотлар ва юқори технологияли бутловчи қисмларни Россияга етказиб бериш ҳақида кетмоқда.
“Дипломатнинг эътибори Қирғизистон жаҳон ҳамжамиятининг аъзоси сифатида Россияга қарши халқаро санкциялар сиёсатига риоя қилиш учун жавобгар бўлиши кераклигига қаратилди. Қирғизистон ҳудудидан Россияга ҳарбий техника учун ишлатилиши мумкин бўлган товарларни реекспорт қилиш Украина томонидан нодўстона ҳаракат сифатида баҳоланади”, — дейилади Украина ТИВ баёнотида.
20 июль куни АҚШ Молия вазирлигининг Хорижий активларни назорат қилиш бошқармаси (OFAC) Қирғизистондаги 4 та компанияга нисбатан санкциялар жорий қилди.
Белгиланганидек, чора-тадбирлар Еттилик гуруҳи (G7) мамлакатлари раҳбарлари томонидан 2023 йил 24 февраль ва 2023 йил 19 майда қабул қилинган мажбуриятлар доирасида кўрилмоқда. Россия Қирғизистондаги ташкилотлардан икки томонлама технологияни сотиб олиш учун фойдалангани айтилмоқда.
Изоҳ (0)