АҚШ Туркманистонга Россияга қарши санкциялардан фойда кўришда ёрдам бермоқчи

АҚШ Туркманистон ҳукуматига ва маҳаллий бизнесга Россияга қарши санкциялардан фойда кўришда ёрдам бермоқчи. Бу ҳақда АҚШ давлат котибининг Жанубий ва Марказий Осиё ишлари бўйича ёрдамчиси Дональд Лу Ашхободга ташрифи чоғида маълум қилди, деб ёзади «РБК».

«Биз Туркманистон ҳукумати ва ишбилармон доиралари билан ишлаб, уларга санкция режимидан ўзлари учун кўпроқ фойда олишда ёрдам беришдан хурсанд бўламиз», — деди у брифинг чоғида.

Унинг таъкидлашича, Туркманистон иқтисодиёти учун хавфлар «жуда кам», чунки Ашхобод Москва билан мудофаа соҳасида катта ҳамкорлиги йўқ, шунингдек, мамлакатнинг россиялик олигархлар билан жиддий алоқалари ҳам йўқ. Қийинчиликларга дуч келиши мумкин бўлган ягона соҳа — Россия орқали банк операциялари, деди Лу.

АҚШ давлат котиби ёрдамчиси эслатишича, Қозоғистондаги энг йирик Россия банклари қозоғистонлик мулкдорларга сотилган. «Қозоғистондаги Alfa Bank ва Сбербанк энди Қозоғистон банклари ҳисобланади, яъни қозоғистонлик бизнесменлар россиялик бизнесменларга тегишли бўлган банкларни сотиб олиш орқали фойда кўрди», — дея аниқлик киритди у.

Украинада махсус операция бошлагач, Ғарб мамлакатлари Россияга қарши қатъий санкциялар киритди. Россия ҳукумати санкциялар Москвадан кўра, уларни жорий қилаётганларга кўпроқ зарар келтириши ҳақида кўп бора айтган.

Хусусан, октябрь охирида Россия президенти Владимир Путин россиялик экспертларга таяниб, санкциялар билан боғлиқ қийинчиликларнинг авж нуқтасидан ўтилганини ва мамлакат, умуман олганда, янги шароитларга мослашганини маълум қилди. Энди Россия иқтисодиёти янада мустаҳкамроқ, янада суверенроқ платформада ривожланади, деди у.

Июнь ўрталарида Путин Туркманистон президенти Сердар Бердимуҳамедов билан икки мамлакат стратегик шериклигини чуқурлаштириш ҳақида декларация имзолаган эди.

Ҳужжатда сиёсий, савдо-инвестициявий, маданий-гуманитар, биологик ва ахборот хавфсизлиги, ҳуқуқий, транспорт ва энергетика соҳаларидаги ҳамкорликнинг устувор жиҳатлари қайд этилган.