Марказий Осиё мамлакатлари Россияга “икки мақсадли” товарлар етказиб беришни кўпайтирди, руслар ундан ҳарбий техника таъмирлашда фойдаланиши мумкин. Бу ҳақда Европа Иттифоқининг махфий ҳужжатига таяниб, The Telegraph хабар берди.
Европа расмийлари Қозоғистон, Қирғизистон, Ўзбекистон ва бошқа Осиё мамлакатлари орқали Европа Иттифоқидан Россияга савдо каналларини аниқлади, улар орқали етказиб бериш ҳажми 60-80 фоизга ошган. Етказиб берилаётган товарлар орасида кир ювиш машиналари, камералар ва автомобиллар борлиги, улар ҳарбий мақсадларда фойдаланилиши мумкинлиги келтирилган. Руслар Украинадаги урушда шикастланган танклар, бронетранспортёрлар, разведкачи дронлар ва бошқа жиҳозларни таъмирлаш учун электроника ва бошқа бутловчи қисмлардан фойдаланаётгани айтилмоқда.
Манбаларга кўра, юкнинг салмоқли қисми Европа Иттифоқидан Беларусга экспорт қилинади ва Литва билан қуруқлик чегараси орқали Марказий Осиё мамлакатларига етказилади. Европаликлар экспорт ҳужжатларини фақат минтақанинг ташқи чегарасигача кузатиши мумкин, шундан сўнг ускуналар ҳаракатини назорат қилиб бўлмайди. Европа Иттифоқи расмийлари осиёлик иттифоқчилар Кремлга Россияни ҳарбий техникадан маҳрум қилишга қаратилган халқаро санкцияларни четлаб ўтишда ёрдам бераётганидан хавотирда.
Эндиликда Европа Иттифоқи россияликлар билан савдо қилувчи мамлакатларга нисбатан чекловлар жорий этишни режалаштирмоқда, бироқ биринчи навбатда сиёсатчилар муаммони иқтисодий оқибатларга таҳдид солиб, дипломатия йўли билан ҳал қилмоқчи. Қозоғистон аллақачон мамлакат орқали ўтадиган товарлар устидан назоратни кучайтиришга ваъда берган.
“Биз иккиламчи санкцияларнинг барча хавф-хатарларини тушунамиз, шунинг учун барча ҳамкорлар билан ўзаро савдомизни диққат билан кузатиб борамиз”, — деб изоҳ берган Қозоғистон ҳукумати.
Telegraph Польшанинг Беларусь билан чегарасини ёпганига эътибор қаратди, аммо Литва Минск билан савдо алоқаларини давом эттирмоқда. Шу билан бирга, Литва ҳукумати Беларусь орқали савдо етказиб беришнинг 97 фоизи бошқа давлатлар томонидан амалга оширилаётганидан шикоят қилмоқда. G7 дипломатлари, шунингдек, Россия ҳарбийларига ёрдам бермаслик учун Туркия, Арманистон ва БААни диққат билан кузатиб бормоқда.
Изоҳ (0)