Олий суд 2019—2023 йилларда судланган шахслар томонидан содир этилган айрим турдаги жиноятларнинг ҳудудлар кесими бўйича динамикасини эълон қилди. “Дарё” ҳужжатни таҳлил қилиб, Жиноят кодексининг 97—101-моддалари (қасддан одам ўлдириш) билан боғлиқ ҳолатлар ҳақида маълумот беради.
Рақамлар шуни кўрсатадики, Ўзбекистонда қасддан одам ўлдириш билан боғлиқ жиноятлар йилдан йилга кўпайиб бормоқда. Хусусан, бу ҳолатни содир этганликда айбдор деб топилган шахслар 2019 йилда 376 нафарни ташкил этган бўлса, рақам 2020 йилда 377 нафарни, 2021 йилда 440 нафарни кўрсатган. 2022 йилда эса кўрсаткич бир оз пастлаган — 422 нафар. 2023 йилнинг дастлабки 3 ойи давомида 84 нафар шахс айни шу жиноятни содир этганликда айбдор деб топилган.
Ҳудудлар кесимида таҳлил қилинганда бу жиноят энг кўп қайд этилган ҳудуд Тошкент вилояти экани маълум бўлди: ҳам умумий ҳисобда, ҳам йиллар кесимида. Вилоятда ҳар йили камида 67 нафар шахс қасддан одам ўлдирганлик учун жазога тортилмоқда. Айниқса, 2021 йилда бу кўрсаткич рекорд даражага кўтарилган, 81 нафар шахс судланган. Ҳудудда 2019—2022 йиллар давомида жами 303 нафар шахс шу турдаги жиноятни содир этганликда айбдор деб топилган.
Иккинчи ўринда Тошкент шаҳри қайд этилган, ҳудудда 4 йилда қасддан одам ўлдириш билан боғлиқ 208 та ҳолат аниқланган. Учинчи ўриндаги Самарқандда эса бу кўрсаткич 176 та.
Қасддан одам ўлдириш жиноятчилиги энг кам содир этилган ҳудудлар рейтингидан Сирдарё (42), Бухоро (46) ва Навоий вилоятлари (46) ҳамда Қорақалпоғистон Республикаси (46) ўрин олган.
Изоҳ (0)