“Меҳридарё” лойиҳасига Тошкент вилояти, Тошкент туманида яшовчи Дилноза Полвонова мурожаат қилиб, бахтсиз ҳодиса сабаб бир қўлидан айрилган фарзандига протез қўл ўрнатиш учун халқдан ёрдам сўрамоқда.
— 2013 йили ўғлим Равшанбек Алишеров бувиси билан пахта титиш цехига боришади. Онам эски пахталарни титтирмоқчи бўлиб турганда, ўғлим ўйинқароқлик қилиб ускуна ёнига боради. Ускуна бир зумда қўлини елка қисмидан узиб ташлайди. Бу ҳақида хабар беришганида шок ҳолатига тушиб қолдим, оёқ-қўлларим ишламай қолди. У пайтда Самарқандда яшардик, уни шошилинч касалхонага олиб бордик. Уч соатгача узилган қўлни улаш мумкин экан. Афсуски, вақт ўтгани учун қўлни улай олишмади. Шу кундан бошлаб, оиламизга жуда катта синовлар келди. Ундан аввал турмуш ўртоғимда жигар сиррози аниқланганди. Кейин руҳий ҳолатида ҳам ўзгаришлар бўлди ва тўрт йил аввал унга шизофрения ташхисини қўйишди.
Ўғлим мактаб интернатида ўқийди, ўқишлари яхши. Агар саломатлигида ўзгариш бўлмаганида протез қўлнинг ҳам кераги йўқ эди. Аммо унинг қўли елка қисмидан бўлмагани учун умуртқасида жиддий ўзгариш бор. Шифокорларнинг айтишича, бу кун келиб ювиш ва ўтириш билан боғлиқ жиддий муаммоларни ҳам келтириб чиқариши мумкин экан.
Протез қўл қўйдириш бўйича турли Соғлиқни сақлаш вазирлигига мурожаат қилдим. Айнан ўғлимга керакли бўлган протез қўл Ўзбекистонда қўйилмас экан. Россияда қўйиладиган протез эса 42 000 АҚШ доллари тураркан.
Яширмайман, уй-жойимиз ҳам йўқ эди. Яхши инсонларнинг ёрдами билан уйли ҳам бўлдик. Ўзим ҳеч қаерда ишламайман, сабаби уйимда иккита ногирон инсон бор. Турмуш ўртоғим ҳам ишга яроқсиз. Икки инсоннинг оладиган ногиронлик нафақасига рўзғор тебратамиз.
Аввал ҳам хайрия уюштириб одамлардан маблағ сўрашга мажбур бўлганман. Аллоҳнинг синови экан, мени ва оиламни бир неча бор жиддий синади. Аммо ношукрлик қилмайман, ҳаммаси яхши бўлиб кетишига ишонаман, — дейди беморнинг онаси.
Равшанбек Алишеровга хайрия қилишни истасангиз,
8600 5704 5918 2928 (Узкард)
9860 0301 0154 1909 (Виза)
Полвонова Дилноза
Мурожаат учун: +998 94) 687 87 09
Изоҳ (0)