Украина аҳолининг ижтимоий ҳимоясини кучайтириш ва иқтисодиётни тиклаш учун Жаҳон банкидан 1,5 миллиард доллар кредит олади, деб хабар қилди мамлакат бош вазири Денис Шмигал ўз Telegram каналида.
"Украина Жаҳон банкидан Япония ҳукумати кафолати билан 1,5 миллиард доллар кредит олади. Ҳозиргина Жаҳон банки вице-президенти Антонелла Бассани билан учрашувимиз давомида Жаҳон банки ва Украина Молия вазирлиги тегишли келишувни имзоладилар", — деб ёзди Шмигал.
Унга кўра, маблағлар аҳолининг ижтимоий ҳимоясини кучайтириш ва иқтисодиётни тиклаш учун ажратилган. Бош вазирнинг аниқлик киритишича, Жаҳон банки гуруҳи ҳамкорлар билан биргаликда Украинага ёрдам бериш учун 34 миллиард доллар маблағ ажратган. Шундан 22 миллиард доллардан ортиғи аллақачон мамлакат бюджетига келиб тушган.
Аввалроқ Украина молия вазири Сергей Марченко мамлакат бюджети жорий йилда қайта кўриб чиқилиши мумкинлигини айтган эди. Расмийлар 2024 йилда бюджетни ташқи молиялаштириш ҳажми 2023 йилдагидан кам бўлмаслигига умид қилишаётганини маълум этишган.
Изоҳ (0)