Москвада ҳуқуқ-тартибот идоралари ходимлари 2014 йилда ўзини ўзи мустақил деб эълон қилган Донецк халқ республикаси (ДХР) қўшинларига раҳбарлик қилган Игор Стрелковни (ҳақиқий исми Гиркин) ҳибсга олди. Бу ҳақда РБК хабар берди.
Манбаларга кўра, собиқ федерал хавфсизлик хизмати зобити 21 июль куни тушга яқин уйидан олиб кетилган. Ҳозир унинг квартираси тинтув қилинмоқда. Ҳибсга олиш “Вагнер” собиқ ходимининг илтимосига биноан амалга оширилгани айтилмоқда.
Терговни Федерал хавфсизлик хизмати олиб боради. Айбланувчининг адвокати Александр Молохов ҳозирда Стрелковнинг қаердалигини қидирмоқда. У Россия Федерацияси Тергов қўмитасига кетаётганини қайд этди.
Стрелковнинг Telegram’ида унинг рафиқаси Мирослава Регинскаянинг хабари пайдо бўлди. Унинг сўзларига кўра, у Тергов қўмитаси вакиллари келганида уйда бўлмаган.
“Дўстларим орқали эримга нисбатан Жиноят кодексининг 282-моддаси (экстремизм) бўйича айблов қўйилганини билдим”, — дейди Стрелковнинг рафиқаси.
Игор Стрелков 2022 йил 14 август куни ДХР мудофаа вазири лавозимидан четлаштирилган ва шундан бери жанговар ҳаракатларда қатнашмаган.
2022 йил февраль ойидан бери Стрелков уруш ҳудудига боришга тайёрлигини бир неча бор эълон қилган, шу билан бирга, мамлакат раҳбарияти ва Мудофаа вазирлиги, Бош штаб раҳбари Валерий Герасимов ва ”Вагнер” асосчиси Евгений Пригожинни танқид қилган.
Стрелков Гаага туман суди томонидан сиртдан умрбод қамоқ жазосига ҳукм қилинган. У 2014 йил августида Малайзиянинг Boeing ҳалокатида айбдор деб топилганди. Стрелков суд мажлисларида қатнашмаган ва ўз айбини қатъиян рад этган.
Изоҳ (0)