Андижон шаҳар судида 26 июнь куни Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) билан айбланаётган фуқаро М.А.нинг иши кўриб чиқилди. “Дарё” Интернет тармоғида эълон қилинган суд қарорлари портали орқали ушбу суд якуни бўйича маълумот беради.
Суд ҳужжатида ёзилишича, М.А. 2002 йил 13 июнда Андижон шаҳрида туғилган, миллати ўзбек, маълумоти ўрта-махсус, уйланмаган, муқаддам судланмаган, мавсумий ишчи. Шу йилнинг 5 май кунидан иш бўйича айбланувчи тариқасида иштирок этишга жалб қилиниб, 24 февралдан гаров эҳтиёт чораси қўлланган. У Жиноят кодексининг 244-1-моддаси 3-қисми “г” банди билан айбланган.
Аниқланишича, у 2022 йил 23 июль куни ўзига тегишли бўлган iPhone 6S телефони орқали Telegram мессенжерига уланиб, ундан фойдаланиш давомида ҳозирда Ўзбекистон Республикаси ҳудудидаги олиб кириш, тайёрлаш ва тарқатиш мумкин бўлмаган, фаолияти тақиқланган ўзбек тилидаги нашидани танишига юбориш орқали тарқатган. Нашида мазмуни эса жиҳодга тарғиб қилиш бўлган.
Дин ишлари қўмитаси ўтказган судга оид диншунослик экспертизаси хулосасига кўра, М.А. ижтимоий тармоқда тарқатган маърузалар ақидапарастлик ғоялари билан йўғрилгани ва мазкур ғояларни мамлакатга олиб кириш, тайёрлаш ва тарқатиш тақиқлангани, шунингдек, ушбу маълумот Ўзбекистонда фаолияти тақиқланган “Тавҳид ва жиҳод котибаси” террорчи ташкилотига тегишли бўлиб, уларни мамлакатга олиб кириш, тайёрлаш ва тарқатиш тақиқлангани кўрсатилган.
Судланувчи суд мажлисида айбига тўлиқ иқрор бўлиб, ҳақиқатан ҳам YouTube платформаси орқали “Абдуллоҳ домла”, “Шукуруллоҳ домла”ларнинг маърузаларини ҳамда Telegram’да диний мазмундаги нашидаларни тинглаб келганини тан олган. Унга тегишли телефон аппарати холислар ва мутахассислар иштирокида олиниб, текширилганда танишига номаълум шахс томонидан айтилган 2 та диний мазмундаги нашидаларни юборгани аниқланганини, диний билимга эга эмаслигини, ушбу нашидаларнинг мусиқаси ёқимлилиги сабаб танишига телефон аппаратининг чақирув мусиқасига ўрнатиши учун юборганини айтган.
Айбланувчининг кўрсатмасига кўра, у нашида ва маърузаларнинг тақиқланганини билмаган, юрт тинчлигини бузиш ва бошқа фуқароларни диний маълумотлардаги чақириқларга даъват қилиш нияти бўлмаган, нашида ва маърузаларнинг асл мазмун-моҳияти нимага қаратилганини ҳам тушунмаган, шунчаки ёқимли мусиқа сифатида тарқатган. М.А. суд залида қилмишидан пушаймонлигини билдириб кўрсатув берган ва суддан қонуний енгиллик беришни сўраган.
Суд судланувчи М.А.га нисбатан жазо тайинлашда муқаддам судланмаганини, айбига тўлиқ иқрор ва қилмишидан пушаймонлигини, ёшлигини жазони енгиллаштирувчи ҳолатлар деб, жиноятни ғараз ва паст ниятларда содир этганини оғирлаштирувчи ҳолат деб баҳолаган. Шунингдек, суд у айбли деб топилаётган модда санкцияси доирасида назарда тутилган озодликдан маҳрум қилиш жазоси тайинлашни, уни қилмишидан пушаймонлигини ва ёшлигини инобатга олиб, М.А.га тайинланган жазони ўтамасдан туриб ҳам унинг хулқини назорат қилиш орқали тузатиш мумкин, деган хулосага келган.
Суд ҳукмига кўра, М.А. Жиноят кодексининг 244-1-моддаси 3-қисмининг “г” банди билан айбли деб топилган. Унга нисбатан 5 йил озодликдан маҳрум қилиш жазоси тайинланган. Шу кодекснинг 72-моддасини (шартли ҳукм қилиш) қўллаб, тайинланган озодликдан маҳрум қилиш жазоси шартли ҳисобланган ва 1 йил синов муддати белгиланган.
“Ашёвий далил бўлган бир дона DVD диск жиноят иши билан бирга сақлансин. Ашёвий далил 1 дона iPhone 6S телефони тегишли тартибда йўқ қилинсин. М.А.нинг Telegram’даги профили фаолияти тўхтатилиб, блоклансин”, — дейилади суд ҳукмида.
Мавзуга доир:
- “Йигитнинг ҳаракати тўғри малакаланган”. Тошкент вилояти ИИББ йигит нашида тарқатгани учун 3 йилга қамалгани ҳақида
- “Наҳотки бир хатоси учун шунчалик оғир жазолаш тўғри бўлса” — 21 ёшли талабанинг диний қўшиқ сабаб 3 йилга қамалгани эътирозларга сабаб бўлди
- Нашида тарқатганликда айбланган талаба йигитнинг адвокати мурожаат билан чиқди
Изоҳ (0)