Instagram ижтимоий тармоғида қарийб 1 миллион обуначига эга бўлган блогер “Асад-алго” вафот этганди. Тошкент шаҳар ИИББ ҳолат юзасидан жиноят иши қўзғатилганини маълум қилди.
Қайд этилишича, 19 июль куни Республика шошилинч тез тиббий ёрдам кўрсатиш марказига 2002 йилда туғилган Асадбек Арзикулов (“Асад-алго”) “бош мия ёпиқ жароҳати, бош мия лат ейиши, бош субдурал гематомаси, бўйин соҳаси қонталаши, иккала тиззаси ва иккала тирсагида кўкарган жароҳатлари” билан мурожаат қилган. Шифокорлар томонидан бу ҳолат ҳақида зудлик билан ИИОга хабар берилган.
Ўрганишлар жараёнида аниқланишича, 16 июль куни Мирзо Улуғбек туманидаги боғлардан бирида 1997 йилда туғилган Абдулазиз И. таниши Асадбек А. билан ўртасида ўзаро келишмовчилик сабабли жанжал келиб чиққан. Натижада Асадбек А. тан жароҳати олган. Сўнг улар ўзаро келишиб олгани сабабли тарқалишган.
Мазкур ҳолат юзасидан Асадбек ИИОга, шунингдек тиббиёт муассасасига мурожаат қилмаган.
19 июль куни унинг тоби қочгани сабабли шифохонага олиб борилган ва унинг бош қисмида жарроҳлик амалиёти ўтказилган. Бироқ шифокорларнинг саъй-ҳаракатларига қарамасдан, вафот этган.
Мазкур ҳолат юзасидан Жиноят кодексининг 104-моддаси 3-қисми “д” банди (қасддан баданга оғир шикаст етказиш жабрланувчининг ўлишига сабаб бўлиши) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)