Ижтимоий тармоқларда Ёзувчилар уюшмасининг Тошкент вилояти Қибрай туманида жойлашган Дўрмон ижод уйи бузиб ташланаётгани ҳақида хабарлар тарқалди. Ҳолат юзасидан “Дарё” мухбири Дўрмон ижод уйи директори Асқар Умматқуловдан изоҳ олди.
Маълумот учун, Дўрмон ижод уйи 114 кишилик меҳмонхона ва ижодкорлар учун алоҳида ҳовли уйлар ( коттежлар )дан иборат.
Асқар Умматқуловнинг айтишича, Дўрмон ижод уйида бузиш ишлари эмас, аксинча, кенгайтириш, яъни ландшафтини ўзгартириш, соя-салқин боғга айлантириш устида ишланмоқда.
“Уй ҳудудида жойлашган битта коттеж 16-18 сотих майдонни эгаллаган. У бир нафар ижодкор ихтиёрига берилади. Хўш, ижодкор бу ерда ижодини қилсинми ёки коттеж атрофидаги ерни обод қилсинми? Шуни ҳисобга олган ҳолда, коттежни 3 га бўлиб, унинг ўрнида 3 та коттеж қуриш режалаштирилган. Биринчидан, ердан унумли фойдаланилади, иккинчидан коттеж учун навбатда турган уюшма аъзоларига кўпроқ жой ажратиш имконини яратади. Мавжуд коттежларнинг ҳолати ўрганиб чиқилиб, имкон қадар ўзини сақлаб қолишга ҳаракат қилинади”, — деди ижод уйи директори.
Унинг алоҳида таъкидлашича, янги қуриладиган комплексда соғломлаштириш мажмуасини бунёд этиш кўзда тутилган. Шунингдек, меҳмонхона биноси ҳам замонавий кўринишда таъмирланади.
“Коттежларда турган ижодкорларни қурилиш жараёнида вақтинча чиқариб туриш кўзда тутилган. Аслида коттежлар яшаш учун эмас, балки маълум бир муддатга ижод қилиш учун ажратилади. Тўғри, бугунги кунда коттежларда ижодкорлар орасида уйи йўқ, моддий қийналаётганлари ҳам бор. Уларни имкон қадар ижтимоий қўллаб-қувватлаш чораларини кўриш кун тартибида турибди”, — деди Асқар Умматқулов.
Қўшимча қилинишича, қурилиш ишларига Тошкент вилояти ҳокимлиги бюртмачи бўлади ва қурилиш ишларини ташкиллаштиради. Айни вақтда ҳудудда лойиҳалаш ишлари кетяпти. Бунда ҳар бир бинонинг техник ҳолати ўрганиб чиқилмоқда.
Қурилиш ишлари қачон бошланиши ва қанча муддат давом этиши, лойиҳа қиймати бўйича ҳозирча маълумот йўқ.
Изоҳ (0)