Ijtimoiy tarmoqlarda Yozuvchilar uyushmasining Toshkent viloyati Qibray tumanida joylashgan Do‘rmon ijod uyi buzib tashlanayotgani haqida xabarlar tarqaldi. Holat yuzasidan “Daryo” muxbiri Do‘rmon ijod uyi direktori Asqar Ummatqulovdan izoh oldi.
Maʼlumot uchun, Do‘rmon ijod uyi 114 kishilik mehmonxona va ijodkorlar uchun alohida hovli uylar ( kottejlar )dan iborat.
Asqar Ummatqulovning aytishicha, Do‘rmon ijod uyida buzish ishlari emas, aksincha, kengaytirish, yaʼni landshaftini o‘zgartirish, soya-salqin bog‘ga aylantirish ustida ishlanmoqda.
“Uy hududida joylashgan bitta kottej 16-18 sotix maydonni egallagan. U bir nafar ijodkor ixtiyoriga beriladi. Xo‘sh, ijodkor bu yerda ijodini qilsinmi yoki kottej atrofidagi yerni obod qilsinmi? Shuni hisobga olgan holda, kottejni 3 ga bo‘lib, uning o‘rnida 3 ta kottej qurish rejalashtirilgan. Birinchidan, yerdan unumli foydalaniladi, ikkinchidan kottej uchun navbatda turgan uyushma aʼzolariga ko‘proq joy ajratish imkonini yaratadi. Mavjud kottejlarning holati o‘rganib chiqilib, imkon qadar o‘zini saqlab qolishga harakat qilinadi”, — dedi ijod uyi direktori.
Uning alohida taʼkidlashicha, yangi quriladigan kompleksda sog‘lomlashtirish majmuasini bunyod etish ko‘zda tutilgan. Shuningdek, mehmonxona binosi ham zamonaviy ko‘rinishda taʼmirlanadi.
“Kottejlarda turgan ijodkorlarni qurilish jarayonida vaqtincha chiqarib turish ko‘zda tutilgan. Aslida kottejlar yashash uchun emas, balki maʼlum bir muddatga ijod qilish uchun ajratiladi. To‘g‘ri, bugungi kunda kottejlarda ijodkorlar orasida uyi yo‘q, moddiy qiynalayotganlari ham bor. Ularni imkon qadar ijtimoiy qo‘llab-quvvatlash choralarini ko‘rish kun tartibida turibdi”, — dedi Asqar Ummatqulov.
Qo‘shimcha qilinishicha, qurilish ishlariga Toshkent viloyati hokimligi byurtmachi bo‘ladi va qurilish ishlarini tashkillashtiradi. Ayni vaqtda hududda loyihalash ishlari ketyapti. Bunda har bir binoning texnik holati o‘rganib chiqilmoqda.
Qurilish ishlari qachon boshlanishi va qancha muddat davom etishi, loyiha qiymati bo‘yicha hozircha maʼlumot yo‘q.
Izoh (0)