Санкция хавфи туфайли Арманистон, Қозоғистон ва Гонконг банклари Россиядан юридик шахслар учун серверлар, микросхемалар, процессорлар, телекоммуникация ускуналари ва бошқа электроника учун тўловларни блоклашни бошлади. Бу ҳақда “Коммерсант” хабар берди.

Етказиб берувчилар электроникани бошқа товар кодлари остида импорт қилишга ҳаракат қилмоқда, шунингдек, муқобил тўлов усулларини қидирмоқда. Экспертлар дўст мамлакатлар томонидан экспорт назорати кучайиши Россияда олти ой давомида бундай товарлар танқислигига олиб келиши мумкинлигини айтмоқда.

Электроника бозоридаги манбалар сўнгги икки ҳафта ичида Қозоғистон, Арманистон ва Гонконг банклари Россия юридик шахсларининг 8542 ташқи иқтисодий фаолият товар номенклатураси коди (процессор, микросхема ва шу каби товарлар киради) бўйича тўловларни блоклаш ҳолатларига кўпроқ дуч келаётганини айтган.

“Бу Россия билан ҳамкорлик қилувчи банкларга таҳдид соладиган АҚШ санкцияларининг ўнинчи пакети билан боғлиқ”, — дейилади хабарда.

Чекловлар, бошқа нарсалар қатори, блокланган шахсга ёки ундан пул маблағлари, товарлар ёки хизматларни қабул қилувчиларга нисбатан ҳам қўлланади.

Натижада Россия компаниялари компьютерлар, серверлар, маълумотларни сақлаш тизимлари ва бошқа жиҳозларни ишлаб чиқариш учун зарур бўлган компонентларни “муқобил” кодлар остида импорт қилишга мажбур бўлади.

Ҳукуматга яқин бўлган яна бир манба сўнгги авлод телекоммуникация ускуналари, серверларини етказиб бериш учун тўловларни блоклаш ҳолатлари борлигини айтди.

Марказий банк “хорижий банкларнинг тартиб-қоидалари уларнинг ички сиёсатига боғлиқ ва турли даврларда турли даражадаги қатъийлик билан тавсифланиши мумкин” деб тушунтирди.

Россия—Осиё саноатчилар ва тадбиркорлар иттифоқи раҳбари Виталий Манкевич гонконглик ҳамкорлар вазиятни оғир деб таърифлашини айтди. Шу билан бирга, бошқа суҳбатдошнинг таъкидлашича, ҳозирча барча Арманистон ёки Гонконг банклари тўловларни блокламаяпти, етказиб берувчиларнинг ўзлари эса “тўловларни амалга оширишнинг бошқа усуллари”ни қўллашни бошлади.