Жиноят ишлари бўйича Шайхонтоҳур туман судида бошланган “Компроматузб иши” ёпиқ тарзда кўриладиган бўлди. Бунга судланувчилар — Хуршид Далиев ва Мавжуда Мирзаеваларнинг илтимоси асос қилиб кўрсатилди, дея хабар берди “Дарё” мухбири.
Дастлаб ОАВ вакиллари ва судланувчиларнинг яқинлари иштирокида бошланган суд судланувчилар илтимосидан сўнг ёпиқ тарзда давом этди.
Судда тарафлардан ташқари оммавий ахборот воситалари ҳам иштирок эта бошлашди. Бироқ судланувчилар томонидан судга жараённи ёпиқ тарзда кўриш бўйича илтимоснома киритилди. Суд барча тарафлар илтимоси ва Жиноят процессуал кодексининг тегишли моддалари талабларига риоя қилган ҳолда суд жараёнини ёпиқ тарзда кўриш бўйича қарор қабул қилди. Суднинг бу қарорида қонунга зид ҳолат йўқ, — дейди Олий суд ахборот хизмати раҳбари Азиз Обидов.
“Дарё” журналисти Азиз Обидовга судланувчилар, хусусан, Сиёвуш Ҳошимовнинг адвокатлари суд аввалида судланувчиларга қўйилган айблов моддалари суднинг очиқ тарзда ўтишини талаб қилишини ва суд ёпиқ ўтишига ҳеч қандай асос йўқлигини айтганини эслатиб, бунга ҳам изоҳ сўради.
Аслида судланувчиларга нисбатан қўйилган айбловлар — Жиноят кодексининг 139-моддаси, 165-моддаси ва 110-моддаси иш ёпиқ тарзда кўрилишини қонунан талаб қилмайди. Қонунан ёпиқ судда кўрилиши керак бўлган моддалар аниқ белгилаб қўйилган. Бу давлат сирлари, жинсий жиноятлар, вояга етмаганлар билан боғлиқ жинсий жиноятлардир. Лекин Жиноят процессуал кодексининг 19-моддасида белгилаб қўйилганки, шу моддалар билан боғлиқ жиноят иши кўрилишида шахснинг, у судланувчи бўладими, жабрланувчи бўладими, суд жараёнида қадри, шаънига таъсир қилса, унда шу судни ёпиқ тарзда кўриш масаласи кўтарилиши мумкин. Бугун мана шу талабга риоя қилинган ҳолда икки судланувчи шунақа талаб киритди. Суд эса буни инобатга олди, — дейди Азиз Обидов.
Олий суд вакили жамоатчилик суд ёпиқ кўрилса, шаффоф ва адолатли ўтишига шубҳаланишига доир саволга ҳам жавоб берди ва бундай шубҳага бориш асоссиз эканини айтди.
Жамоатчиликнинг шубҳаси асоссиз. Ишонаман ва барчани ишонтираманки, суд адолатли, қонун талабларига риоя қилинган ҳолда бўлади, — деди у.
Айни пайтда суд судланувчилар — журналист ва “Human.uz” сайти директори Хуршид Далиев, Камбағалликни қисқартириш ва бандлик вазирлигининг собиқ матбуот котиби Мавжуда Мирзаева, “Ўзбекнефтгаз” АЖ собиқ матбуот котиби Сиёвуш Ҳошимов ҳамда фуқаро Аҳмадулло Аҳмаджоновларни гумонланувчилар сифатида суд қилмоқда.
Айблов хулосасига кўра, улар айбланаётган суд ишида 18 нафар жабрланувчи ва 10 нафар фуқаровий даъвогар борлигини, 5 миллиард 140 миллион сўмлик зарар етказилгани айтилмоқда.
Изоҳ (0)