Jinoyat ishlari bo‘yicha Shayxontohur tuman sudida boshlangan “Kompromatuzb ishi” yopiq tarzda ko‘riladigan bo‘ldi. Bunga sudlanuvchilar — Xurshid Daliyev va Mavjuda Mirzayevalarning iltimosi asos qilib ko‘rsatildi, deya xabar berdi “Daryo” muxbiri.
Dastlab OAV vakillari va sudlanuvchilarning yaqinlari ishtirokida boshlangan sud sudlanuvchilar iltimosidan so‘ng yopiq tarzda davom etdi.
Sudda taraflardan tashqari ommaviy axborot vositalari ham ishtirok eta boshlashdi. Biroq sudlanuvchilar tomonidan sudga jarayonni yopiq tarzda ko‘rish bo‘yicha iltimosnoma kiritildi. Sud barcha taraflar iltimosi va Jinoyat protsessual kodeksining tegishli moddalari talablariga rioya qilgan holda sud jarayonini yopiq tarzda ko‘rish bo‘yicha qaror qabul qildi. Sudning bu qarorida qonunga zid holat yo‘q, — deydi Oliy sud axborot xizmati rahbari Aziz Obidov.
“Daryo” jurnalisti Aziz Obidovga sudlanuvchilar, xususan, Siyovush Hoshimovning advokatlari sud avvalida sudlanuvchilarga qo‘yilgan ayblov moddalari sudning ochiq tarzda o‘tishini talab qilishini va sud yopiq o‘tishiga hech qanday asos yo‘qligini aytganini eslatib, bunga ham izoh so‘radi.
Aslida sudlanuvchilarga nisbatan qo‘yilgan ayblovlar — Jinoyat kodeksining 139-moddasi, 165-moddasi va 110-moddasi ish yopiq tarzda ko‘rilishini qonunan talab qilmaydi. Qonunan yopiq sudda ko‘rilishi kerak bo‘lgan moddalar aniq belgilab qo‘yilgan. Bu davlat sirlari, jinsiy jinoyatlar, voyaga yetmaganlar bilan bog‘liq jinsiy jinoyatlardir. Lekin Jinoyat protsessual kodeksining 19-moddasida belgilab qo‘yilganki, shu moddalar bilan bog‘liq jinoyat ishi ko‘rilishida shaxsning, u sudlanuvchi bo‘ladimi, jabrlanuvchi bo‘ladimi, sud jarayonida qadri, shaʼniga taʼsir qilsa, unda shu sudni yopiq tarzda ko‘rish masalasi ko‘tarilishi mumkin. Bugun mana shu talabga rioya qilingan holda ikki sudlanuvchi shunaqa talab kiritdi. Sud esa buni inobatga oldi, — deydi Aziz Obidov.
Oliy sud vakili jamoatchilik sud yopiq ko‘rilsa, shaffof va adolatli o‘tishiga shubhalanishiga doir savolga ham javob berdi va bunday shubhaga borish asossiz ekanini aytdi.
Jamoatchilikning shubhasi asossiz. Ishonaman va barchani ishontiramanki, sud adolatli, qonun talablariga rioya qilingan holda bo‘ladi, — dedi u.
Ayni paytda sud sudlanuvchilar — jurnalist va “Human.uz” sayti direktori Xurshid Daliyev, Kambag‘allikni qisqartirish va bandlik vazirligining sobiq matbuot kotibi Mavjuda Mirzayeva, “O‘zbekneftgaz” AJ sobiq matbuot kotibi Siyovush Hoshimov hamda fuqaro Ahmadullo Ahmadjonovlarni gumonlanuvchilar sifatida sud qilmoqda.
Ayblov xulosasiga ko‘ra, ular ayblanayotgan sud ishida 18 nafar jabrlanuvchi va 10 nafar fuqaroviy daʼvogar borligini, 5 milliard 140 million so‘mlik zarar yetkazilgani aytilmoqda.
Izoh (0)